Ռուսական մամուլն անդրադարձել է Հայաստանի կառավարության հրաժարականին։ Որպես նոր վարչապետի թեկնածու Կարեն Կարապետյանի առավելությունը «Կոմերսանտի» հրապարակումը նշում է այն հանգամանքը, որ նա քիչ է ասոցացվում երկրի ներկա ղեկավարության հետ, քանի որ Երևանում բողոքի ցույցեր են ընթանում, և ժողովուրդը դժգոհ է իշխանություննևրից։
Կարեն Կարապետյանի «Գազպրոմի» նախկին գործընկերները և ծանոթները թերթի հետ զրույցում նրան բնութագրել են որպես շատ գործուն և նորարարական ոգով մարդու, բայց և որպես հեշտ բռնկվողի։ «2001-2010թթ. «Հայռուսգազարդի» ղեկավար եղած ժամանակ նա շատ բան է արել Հայաստանի գազատրանսպորտային համակարգի զարգացման համար, նա լավ հարաբերությունների մեջ է «Գազպրոմի» վարչության ազդեցիկ անդամ Կիրիլ Սելեզնյովի հետ, ով կարող է նրան օգնել լավ հարաբերություններ հաստատել Ռուսաստանի իշխանությունների հետ արդեն նոր կարգավիճակում։
Պարբերականը նաև անդրադառնում է Էդուարդ Նալբանդյանի հնարավոր հրաժարականին՝ ասելով, թե լուրերը, որ ԱԳՆ-ը գլխավորելու է նախագահի աշխատակազմի ղեկավար Վիգեն Սարգսյանը, իրականությանը չեն համապատասխանում։ «Էդուարդ Նալբանդյանը կշարունակի պաշտոնավարել»,- «Կոմերսանտին» ասել է ԱԳՆ աղբյուրը։
Ռուսական ռբկ.ռու կայքը, նշելով նույն օրը տեղի ունեցած Հայաստանի և Ղազախստանի վարչապետների հրաժարականները, իր վերլուծությունն է անում Երևանի իրադարձությունների վերաբերյալ։
«Երկու դեպքում էլ հանրապետությունների ղեկավարությունները այդպես են փորձում հաղթահարել խոր սոցիալական և քաղաքական ճգնաժամերը, նշում է ռբկ-ի մեկնաբանը՝ շեշտելով, որ Հովիկ Աբրահամյանի հրաժարականը նաև պատասխան էր Սերժ Սարգսյանի՝ ազգային համաձայնության կառավարություն կազմավորելու կոչին։
Մեկնաբանը նաև հիշում է, որ Աբրահամյանի կառավարության ժամանակ հանրապետությունը մի քանի ծանր ճգնաժամ է տարել, այդ թվում՝ 2014թ. աշնան փոխարժեքի անկումն ու ինֆլյացիան, ինչպես նաև ռուս զինվորի կողմից մի ամբողջ ընտանիքի կոտորածը։ Հրապարակման մեջ հիշվում է նաև 2015թ. ամռանը հոսանքի գների բարձրացումը և դրա հետ կապված «Էլեկտրիկ Երևանի» բողոքները, ինչպես նաև «Սասնա ծռերի» գործողությունը։
Խոսելով նոր վարչապետի հավանական թեկնածուի մասին, ռբկ-ն նշում է ինչպես նրա սերտ առնչությունները Մոսկվայի հետ, այնպես էլ այն հանգամանքը, որ Կարեն Կարապետյանը գտնվում է համակարգից դուրս։ Հայ մեկնաբանը պարբերականին ասել է, որ Կարապետյանի առաջ 2 հիմնական խնդիր կծառանա՝ բարեփոխումներ իրականացնելու համար նախագահից քարտ-բլանշ ստանալը և Հանրապետական կուսակցության նոր կուրսին չընդդիմանալը, որը տեսականորեն կարող է այդ բարեփոխումների զոհը դառնալ։