«ՎՏԲ-Հայաստան բանկ» ՓԲԸ գլխավոր տնօրեն, տնօրինության նախագահ Վալերի Օվսյաննիկովը և նախագահության անդամ, բանկի ֆինանսական տնօրեն Յուրի Գուսևը այսօր ներկայացրին Հայաստանում ՎՏԲ բանկի գործունեության հինգ տարիների արդյունքներն ու ձեռքբերումները:
Օվսյաննիկովը նկատեց, որ ՎՏԲ-ն ամենաբազմաքանակ մասնաճյուղեր ունեցող բանկն է Հայաստանում, մասնավորապես՝ ՎՏԲ-ի 68 մասնաճյուղերից 24-ը տեղաբաշխված են Երևանում, 44-ը` մարզերում: Նրա խոսքերով, այս հինգ տարիների ընթացքում բավական փոփոխություններ են եղել, արդիականացվել և բարձր որակի են բերվել բանկի սպասարկման կենտրոնները. «Եթե 4 տարի առաջ մենք աշխատում էինք վատ պայմաններում` գրեթե Pentium «մինուս մեկ» համակարգիչներով, ապա այսօր մեր 68 մասնաճյուղերից 62-ն ամբողջությամբ վերանորոգված են»:
Օվսյաննիկովը նաև տեղեկացրեց, որ այս տարիների ընթացքում բանկը բավական հաստատուն աճ է գրանցել: 2010 թ. զուտ եկամուտը կազմել է 4.4 մլրդ դրամ, և աճը 2009-ի նկատմամբ կազմել է 406.7 տոկոս: Այս ցուցանիշներով 2010 թ. ՎՏԲ-Հայաստան բանկը հայաստանյան բանկային շուկայում գրավել է երկրորդ տեղը: 2011 թ. առաջին կիսամյակում բանկի զուտ եկամուտը կազմել է 1.3 մլրդ դրամ` զբաղեցնելով երրորդ տեղը հայաստանյան բանկային շուկայում:
Բանկի հաճախորդների վարկային պորտֆելը 2010 թ. ավելացել է 21.1 տոկոսով` մինչև 86.6 մլրդ դրամ:
Օվսյաննիկովի խոսքերով, այս տարիների ընթացքում իրենք աշխատել են երեք հիմնական ուղղություններով` սպառողական, հիպոթեկային վարկավորում և վարկային քարտեր, ակտիվ համագործակցել են մեծածախ և մանրածախ առևտրային, շինարարական և սննդաարդյունաբերական ձեռնարկությունների հետ: