«Պետք է շատ լուրջ պայքարի նախապատրաստվել, պլանավորել ամե մի քայլը և քայլերն անել ժամանակին: Այսօրվա շատ քաղաքական գործիչների մեջ տեսնում եմ ինձ 5-10 տարի առաջ, և երբեմն ամաչում եմ,- «Առաջին լրատվական»– ի հետ զրույցում ասաց «Հանրապետություն» կուսակցության առաջնորդ Արամ Զ. Սարգսյանը՝ հավելելով, որ հետևություններ է արել իր քայլերից և հիմա հակված է ընտրություններին մասնացելու պարագայում մասնակցել միայն հաղթանակի ակնկալիքով:
Արամ Սարգսյանի դիտարկմամբ՝ ՏԻՄ ընտրությունների միջոցով հնարավոր չէ հասնել հաղթանակի. «Ես չեմ հավատում, որ քվեաթերթիկները կարելի է հաշվել և ասել՝ ընդդիմությունը հաղթեց: Դժբախտաբար այսօրվա իշխանությունները ժողովրդին զրկել են նման հնարավորությունից: Կիրառվում են նույն մեթոդները, ինչ 10 տարի առաջ, և որևէ առաջընթաց չկա: Խոսքը վերաբերում է նաև քաղաքացիական հագուստով ոստիկաններին, բիրտ ուժին, որը կիրառելով ուղղակի ոչնչացնում են պետությունը»:
Արամ Սարգսյանի խոսքով՝ ավելի մեծ վատություն անհնարին է անել արդարադատությանը, քան երբ համատեղ են գործում ոստիկանը և խուլիգանը: «Սակայն այս ամենը չի նշանակում, որ ընտրությունները չպետք է օգտագործել որպես իշխանափոխության միջոց»,- ընդգծեց Արամ Սարգսյանը:
Նա նաև նշեց, որ Սասուն Միքայելյանի ընտրությունները ցույց տվեցին, որ ՏԻՄ ընտրությունները հաղթելու հնարավորություն չեն տալիս, և որ ամենամեծ ընտրակեղծիքները հենց այս ասպարեզում են: Սակայն, ըստ Արամ Սարգսյանի, համապետական ընտրություններով հնարավոր է Հայաստանում հասնել փոփոխությունների:
Մանրամասները՝ տեսանյութում:
