Տարածաշրջանային արտաքին քաղաքական վերջին զարգացումների մասին «Առաջին լրատվական» -ը զրուցեց քաղաքագիտության դոկտոր Հայկ Ա. Մարտիրոսյանի հետ:
Թուրքիայի տանկերն այսօր առավոտյան ներխուժեցին Սիրիա: Թուրքիան այդ մասին տեղեկացրել էր Ռուսաստանին: Թուրքիայի բանակը միջազգային կոալիցիայի ինքնաթիռների աջակցությամբ չորեքշաբթի սկսել է Ջարաբլուսի ազատագրման ռազմական օպերացիան:
Դամասկոսը հանդես է եկել Սիրիայի տարածք թուրքական տանկերի և զրահատեխնիկայի ներխուժման դատապարտմամբ և այդ գործողությունները համարել է Սիրիայի ինքնիշխանության խախտում:
Հայկ Մարտիրոսյանի դիտարկմամբ՝ առանց Ռուսաստանի համաձայնության՝ թուրքական ուժերը չէին ներխուժի Սիրիա, քանի որ Ռուսաստանն այսօր ամենաակտիվ խաղացողներից է Սիրիայի թատերաբեմում և քրդերին սատարում էր մինչև բոլորովին վերջերս:
«Ակնհայտորեն տեղի է ունեցել գործարք Ռուսաստանի և Թուրքիայի միջև, որով Ռուսաստանը աչք է փակել քրդերի հարցում, գոնե երեք քրդական կանտոնների միացման մասով Ռուսաստանը հանձնել է քրդերին և փոխել է իր դիրքորոշումը, որովհետև ամիսներ առաջ լուրջ տարաձայնություններ եղան Ռուսաստանի և Սիրիայի նախագահների միջև՝ կապված քրդական ինքնավարության հետ. ռուսները պնդում էին, որ քրդերը պետք է ստանան ինքնավարություն, իսկ Սիրիայի նախագահը դեմ էր դրան: Սա, կարծում եմ, Հայաստանի համար բավականին հետաքրքիր օրինակ պետք է լինի:
Երկրորդ հանգամանքն այն է, որ միջազգային ճանաչումը, ՄԱԿ-ի անդամ լինելը և սուվերենությունը ամենևին չեն երաշխավորում հարձակման զսպումը, և այնպիսի պետություն ինչպիսին Թուրքիան է, ով մշտապես իր շահերն է հետապնդում՝ ոչինչ և ոչ ոքի հետ հաշվի չնստելով, և պատրաստ է կատարել միջազգային իրավունքի տեսանկյունից ամենևին ոչ ընդունելի քայլեր, հաստատ որևէ երկրի ՄԱԿ-ի անդամ լինելու պարագայում անգամ կանգ չի առնի իր խնդիրները լուծելիս:
Խնդիրն այն է, որ պայքարելով Լեռնային Ղարաբաղի միֆական միջազգային ճանաչման համար, շեշտը դնելով դրա վրա և կարծելով, թե ճանաչմումը կամ կարգավիճակը ինչ-որ բանի դիմաց, թեև այսօր անգամ դա չի քննարկվում, մենք կարող ենք լուծել Լեռնային Ղարաբաղի խնդիրը և դրանով ապահովել անվտանգություն, ապա մենք խոր մոլորության մեջ ենք»,- նշեց քաղաքագետը:
Նա նաև հավելկեց, որ Սիրիական ճգնաժամի հետևանքով Հայաստանը կարող է լուրջ խնդիրներ ունենալ քրդերի հետ:
Մանրամասները՝ տեսանյութում:
