Շինարարական բիզնեսում հայտնի գործարար Սամվել Մայրապետյանին պատկանող «Լոկալ Դիվելոփըրզ» ընկերության դեմ մի քանի գործեր են հարուցված: Տերյան 25, 23, Լալայանց 37 շենքերի բնակիչներն արդեն 10 տարի է բողոքում են ընդդեմ իրենց շենքերի քանդման: Հիշեցնենք՝ նշված տարածքը կառավարության կողմից ճանաչվել էր որպես հանրային գերակա շահ, և տարածքը կառուցապատելու մրցույթում հաղթած Սամվել Մայրապետյանը պատրաստվում է այդ տարածքում հյուրանոցային համալիր կառուցել:
Տերյան 25 շենքի բնակիչ, գեղանկարիչ Վարդան Գաբրիելյանը «Առաջին լրատվական»- ի հետ զրույցում նշեց, որ օգոստոս ամսին դատական գործընթացները դադարեցվել են, քանի որ դատարաններն արձակուրդի մեջ են:
«Մինչ այդ Վերաքննիչ դատարանից մի քանի գործ վերադարձվել է Առաջին ատյանի դատարան, քանի որ գործի քննությունն ամբողջովին չի իրականացվել, բավականին մեծ բացթողութմներ են եղել: Քրեական գործը հարուցված է գնահատող կազմակերպության վրա, առայժմ Ս. Մայրապետյանը քրեական գործով չի անցնում: Նա միշտ կարողանում է մաքուր ու չոր դուրս գալ ջրից՝ իբրև թե ինքը ոչ մի բանից տեղյակ չէ, միայն պատվիրատու է:
Մենք բավականին շատ փաստեր ունենք նրա դեմ, բայց մտածել ենք, որ կարող է խելքի գալ և բնակիչների հետ բանակցել, և այս ալան-թալանը, քաղաքի ավերումն այսպիսով դադարեցնել, բայց նա ոչ մի կերպ չի ուզում գալ մեզ հետ բանակցելու»,- նշեց Վ. Գաբրիելյանը:
Նրա խոսքով՝ սա արդեն իր բնակարանի խնդիրը չէ, հասարակության խնդիրն է. «Եթե հասարակությանը իրոք այս շենքը պետք չլիներ, մենք 20 օրվա մեջ 18 000 ստորագրություն չէինք հավաքի շենքը պահպանելու համար: Այս շենքի քանդելուց հետո ամբողջ Երևանը ճանաչվելու է որպես հանրային գերակա շահ ու քանդվելու է:
Հոգնեցինք Ռոբերտ Քոչարյաններից ու մյուսներից. ոչ միայն Քոչարյանը, այլ ամբողջ մի համակարգ է կանգնած Մայրապետյանի մեջքին, թող թիկունքին կանգնած լինեն, մենք ոչ մեկի բիզնեսին դեմ չենք, բայց եթե մարդն ուզում է բիզնես անել, կարելի է ազնիվ ճանապարհով անել և ոչ ոքի անեծքի ու պարսավանքին չարժանանալ:
Մանրամասները՝ տեսանյութում:
