«Վելես» իրավապաշտպան կազմակերպության նախագահ Մարինե Պետրոսյանն «Առաջին լրատվական» – ի հետ զրույցում, անդրադառնալով գլխավոր դատախազ Գ. Կոստանյանի հրաժարակին, նշեց, որ ուրախ է այդ պաշտոնանկության համար և ցանկալի է, որ նրա օրինակին հետևեն ոստիկանապետը և մյուս բարձրաստիճան պաշտոնյաները, որոնք անտարբերություն ցուցաբերեցին վերջին օրերին Երևանում կատարվող իրադարձությունների ժամանակ: Իրավապաշտպանի կարծիքով՝ նախկին դատախազի հրաժարականը պայմանավորված չէ առողջական խնդիրներով. «Ավելի լավ է մարդիկ հստակ ասեն, որ չեն կարողանում իրականացնել իրենց պարտավորությունները: Սա մեկ անձի խնդիր չէ, համակարգային խնդիր է»:
«Չգիտեինք, որ պետք է հրաժարական տա, նախորդ օրը դիմել ենք պարոն Կոստանյանին՝ դատախազությունում տիրող ապօրինությունների, կոռուպցիոն ռիսկերի վերաբերյալ: Ես որպես կոռուպցիոն ռիսկ գնահատում եմ նաև աշխատակիցների անգրագիտությունը»,- նշեց իրավապաշտպանը: -Վերջին երկու տարվա ընթացքում մենք դատախազության կողմից բավականին մեծ հովանավորության դեպքերի առնչվեցինք, բարձրաձայնել ենք այդ մասին, հարցրել ենք, թե ինչու է լռում դատախազությունը, երբ ակնհայտ ապօրինությունները մարսվում են»:
«Վելես» իրավապաշտպան կազմակերպությունը մի շարք սկանդալային գործեր է բացահայտել: Մարինե Պողոսյանի խոսքով՝ քաղավիացիայի նախկին պետ Հովվհաննես Երիցյանի արարքների փաստի առթիվ երեք գործ հարուցելուց հետո, քրեակական գործ է հարուցվել իր նկատմամբ, որ իբրև թե ղազախական մաֆիայի անդամ լինելով, ահաբեկում է բոլորին:
«Մեր դատախազությունում իրավական գիտելիքների պակաս կա, բայց ֆիզիկայի գիտելիքների պակաս չկա, Նյուտոնի հակազդման օրենքը միանգամից գործում է, փորձում են ճնշում գործադրել, ֆիզիկական սպառնալիքներ էլ են եղել: Երկուսուկես տարվա մեջ ինձ և՛ բռնության են ենթարկել, և՛ ազատությունից են զրկել, պատանդ են վերցրել»:
Իրավապաշտպանը մտահոգություն հայտնեց նաև այն առնչությամբ, որ նախօրեին քննչական կոմիտեում իրեն ասել են, որ կատարվել են իր բնակարանի արտաքին դիտումներ և գաղտնալսումներ. «Փաստորեն տոտալիտար ռեժիմը վերադարձել է, և կարող են մեզ գաղտնալսել, երբ մենք ուղղակի քաղաքացի ենք, մեղադրյալ չենք: Եվ դա արվում է դատախազի ցուցումով: Սա նշանակում է կատարյալ ստրկացում»:
Մարինե Պողոսյանի գնահատմամբ՝ Սարի թաղում տեղի ունեցած իրադարձությունները խայտառակություն էին. «Ես նման գազանություն երբևէ չեմ տեսել, մի ազգ, որը մոռանում է իր հերոսներին, նա ապագա չունի, եթե անցյալը մոռանաք, ուրեմն օդում եք ապագա կառուցում՝ խոստումների վրա»:
Մանրամասները՝ տեսանյութում:
