Ինչպես արդեն հայտնի է, պաշտոնանկ են արվել մի շարք բարձրաստիճան պաշտոնյաներ՝ ՀՀ գլխավոր դատախազը, ԱԱԾ քննչական վարչության պետը, ԱԱԾ պետի տեղակալը, Ոստիկանության Էրեբունի և Նոր Նորք բաժինների ղեկավարները:
«Ազգային անվտանգություն» կուսակցության նախագահ Գառնիկ Իսագուլյանը այս պաշտոնանկությունները չի համարում ինչ-որ իրադարձությունների հետևանք և հորդորում է հավատալ պաշտոնական հաղորդագրություններին:
Ինչ վերաբերում է Գարեգին Չուգասզյանի հայտարարած վերջնաժամկետին՝ ժամը 18-ին հրապարակել իրենց ձեռքի տակ եղած ձայնագրությունը, եթե Ժիրայր Սեֆիլյանի հետ Սերժ Սարգսյանի խոստացած հանդիպումը չկայանա, Գառնիկ Իսագուլյանը Չուգասզյանին խորհուրդ տվեց վերջնաժամկետի լեզվով չխոսել և որպես իրականություն չներկայացնել այն, ինչ չի համապատասխանում իրականությանը:
Նրա խոսքով՝ այդ ձայնագրությունը վերաբերում է բանակցությունների առաջին փուլին, իսկ դրանից հետո «տեղի ունեցան նոր պատանդառություններ, երկրորդ ոստիկանը զոհվեց: Նրանք վախենում են հրապարակել Սեֆիլյանի հետ վերջին խոսակցությունը, որից հետո տղաները հասկացել են, որ իրենց մատաղ են անում, Ժիրայր Սեֆիլյանին իրենց կյանքը առանձնապես չի հետաքրքրում, և տղաները կամովին որոշեցին զենքերը վայր դնել ու դուրս գալ»:
Գառնիկ Իսագուլյանի կարծիքով՝ ամեն ինչ հանգուցալուծվեց, արյունահեղությունը կանխվեց իրավապահների և Սերժ Սարգսյանի համբերության շնորհիվ. «Իսկ շատերին տղաների մահն էր պետք, ու տղաները դա հասկացան»:
Գառնիկ Իսագուլյանը դատապարտելով քաղաքական կուսակցությունների պահվածքը՝ ասաց. «Երբ տեսան՝ մի քիչ ժողովուրդ է հավաքվում, և կարող է սա նժարի այլ կողմ թեքվել, բոլորը հանկարծ դարձան հեղափոխականներ, «Սասնա ծռերը» իրենց համար դարձան հերոսներ, մոռացան կլոր սեղանի շուրջ մեր խոսակցությունը, թե՝ զենքով որևէ հարց լուծել չի կարելի, իսկ հիմա էլ սկսել են երրորդ երգ երգել»:
Առավել մանրամասն՝ տեսանյութում: