«Թե ինչպես մենք այսօր կհաղթահարենք ստեղծված իրավիճակը՝ դա կկողմնորոշի մեր վաղվա կյանքը, մեր գործողությունների բնույթը»,- «Առաջին լրատվական»-ի հետ զրույցում ասաց իրավապաշտպան Արթուր Սաքունցը:
Նրա խոսքով՝ ինքը բավարար չափով փաստեր և հիմնավորում ունի ստեղծված իրավիճակում արդարացնելու «Սասնա ծռեր» խմբավորման գործողությունները, բայց խնդիրը դա չէ: «Արդյունքում ունենք մի իրավիճակ, որտեղ քաղաքացիների իրավունքները ոտնահարվել են, կիրառվել են ոչ լեգիտիմ մեթոդներ, որը հանգեցրել է այնպիսի իրավիճակի, որը գոյություն ունեցող ջրբաժանը կխորացնի և կհանգեցնի ավելի վատ երևույթների: Ուժային մեթոդները կարող են գերակայել և գերազանցել քաղաքակիրթ մեթոդներին»,- ասաց Սաքունցը:
Սաքունցի խոսքով՝ պետք է ստեղծվի երկխոսության հարթակ, որի համար մի քանի կարևոր հանգամանքներ են անհրաժեշտ: Պետք է գործի ԱԱԾ ինստիտուտը, մարդու ազատությունը պետք է գերակա լինի, ուժային մեթոդները պետք է գերակա չլինեն:
Ինչպես նշեց Սաքունցը՝ իշխանությունը «Սասնա ծռերին» կարող է դնել այնպիսի իրավիճակում, որ նրանք գնան գործողությունների, բայց դրանք կարող են անկանխատեսելի գործողություններ լինել: «Մենք պետք է չդիտարկենք, չառանձնացնենք կողմեր, այստեղ կա մեկ կողմ՝ իշխանությունը, պետությունը, որը մոնոպոլիա է, և նա պետք է ադեկվատ որոշում կայացնի, գնա իրավիճակի կարգավորման»:
Ստեղծված իրավիճակում պետք է լինի ճանապարհային քարտեզ, որը կանդրադառնա մի քանի հարցերի՝ իշխանության լեգիտիմություն, երկրում ստեղծված սահմանադրական իրավիճակ:
Առավել մանրամասն՝ տեսանյութում:
