«Ժիրայր Սեֆիլյանի ձերբակալությունը հիմնական պատճառը չէ, դա առիթ է պարզապես։ Նույն բանը կարող էր լինել առանց այդ պատճառի։ Հանրապետությունը փլուզվում է, իշխանությունն այդ հանրապետությունում ևս փլուզվում է. ով այդպես չի մտածում՝ պատկանում է այդ իշխանությանը»,- «Առաջին լրատվական»-ի հետ զրույցում ասաց քաղաքագետ Իգոր Մուրադյանը։ Նրա խոսքով՝ հայ ազգը, չգիտես ինչու, ունակ չեղավ կայուն պետականություն ունենալ, ունակ չեղավ անկախության և ինքնիշխանության, ունակ չէ նաև հեղաշրջում իրականացնելու։
«Այն, ինչ տեղի է ունեցել վերջին տարիների ընթացքում, պարզապես ապստամբություններ էին, գուցեև մեծ ապստամբություններ, բայց ոչ հաստատ հեղափոխություն, դա բոլորովին այլ բան է։ Հիմա նույն բանն է տեղի ունենում: Ես հեռախոսով խոսել եմ նրանց հետ, նրանք կարծում են, որ տեղի ունեցածը պետք է ժողովրդի ոգևորությունը մեծացնի, նրանց մղի հեղափոխության, բայց դա տեղի չի ունենում, ցավոք։ Այն ամբոխը, որ հավաքվել է այնտեղ, չասեմ՝ մարգինալ, բայց հաստատ ոչ հեղափոխականներ են։ Ոչ ոք չգիտի՝ ինչ անի, ոչ ոք չգիտի՝ մեկ ժամից ինչ կլինի, վաղը-մյուս օրը ինչ կլինի։ Ելույթ ունեցողները պոպուլիստներ են, նույնիսկ պոպուլիստ ասվածը լավ է նրանց համար։ Մարդիկ են, ովքեր անելու բան չունեն՝ ոչ մի առաջարկությամբ ու նախաձեռնությամբ հանդես չեկան։ Այո, հանգստացնում էին մարդկանց , բայց հետո՞։
Հիմա իշխանությունների վիճակը. նրանք շփոթված են, որոշում կայացնելու ունակ չեն։ Եթե սովորական իրավիճակում դա այդքան ակնհայտ չէր, ապա այս իրավիճակն ի ցույց դրեց ավելին, ակնհայտ դարձավ, որ նախագահի կողքի ոչ մի չինովնիկ չի կարողանում ոչ մի բան անել»,- հավելեց քաղաքագետը:
Անդրադառնալով ստեղծված իրավիճակում Ռուսաստանի դերին՝ Իգոր Մուրադյանը նկատեց, որ Ռուսաստանը Հայաստանին դիտարկում է որպես իր գաղութ, իր սեփականություն, հետևաբար այստեղ ինչ տեղի է ունենում՝ իր հետ է կապված։
«Ի՞նչ տեղի ունեցավ վերջին շրջանում։ Մի քանի սովորական ոտնձգությունների հետ մեկտեղ՝ ՀԱՊԿ, ԵՏՄ, իրենք ստորագրեցին ՀՕՊ համաձայնագիրը։ Ինչի՞ վերածվեց Հայաստանը. մի շատ կոնկրետ բանի՝ ՆԱՏՕ-ի վրա հարձակման ռազմաբազայի։ ՆԱՏՕ-ն դա կարո՞ղ է հավերժ հանդուրժել։ Նոր ծրագիր էր մշակվել՝ նաև մեզ համար, ՆԱՏՕ-ի գագաթնաժողովի ընթացքում պետք է համաձայնեինք, ստորագրեին: Դա մեզ կհեռացներ միջազգային մեկուսացումից, Ղարաբաղյան պատերազմից, դա մեզ կհեռացներ տարածքների վերադարձման բանակցություններից , իսկ այդ բանակցություններն այսօր վստահաբար ընթանում են»,- հավելեց քաղաքագետը։
