«Տարածքի հանձնումը ոչ թե խաղաղություն կբերի, այլ ընդհակառակը՝ խիստ կթուլացնի հայկական դիրքերը, որը ադրբեջանական կողմին կտանի պատերազմի գնալու գայթակղության»,- այս մասին «Առաջին լրատվական»- ի հետ զրույցում ասաց «Մոդուս Վիվենդի» կենտրոնի ղեկավար Արա Պապյանը՝ անդրադառնալով հուլիսի 16-ին Արցախի և Հայաստանի մի խումբ հասարակական գործիչների կողմից Շուշիում ընդունված հռչակագրին, որով դատապարտում են իշխանությունների՝ Ադրբեջանին հող զիջելու դիրքորոշումը և իրենց մտահոգությունն են հայտնում այդ առթիվ։ Նրա խոսքով՝ Հայաստանի ղեկավարության վրա ուժեղ ճնշում է գործադրվում՝ պարտադրելու հինգ շրջանները հանձնել: Արա Պապյանի կարծիքով՝ տարածքների հանձնումը անընդունելի է, նրա խոսքով՝ խաղաղությունը պահպանվում է ոչ թե բարի կամքով կամ ստորագրված թղթերով, այլ ռազմաքաղաքական հավասարակշռությամբ:
Անդրադառնալով դիտարկմանը, թե ներկայումս Հայաստանում ստեղծված աննախադեպ իրավիճակն ունի ներքին քաղաքական երանգավորում, սակայն գուցե նաև արտաքին քաղաքական հետքեր ևս կան, Արա Պապյանն ասաց, որ զինված ընդդիմության մտահոգություններից մեկը հենց արցախյան խնդրի հետ է կապված. «Իշխանափոխության պահանջը պայմանավորված է ոչ միայն սոցիալ-տնտեսական խնդիրներով, այլ առաջին հերթին նրանով, որ մեր իշխանությունները Ղարաբաղի հարցում պատրաստակամ են զիջումների գնալ. դա է այս ամբողջը հասցրել այս եզրագծին»:
Անդրադառնալով «Սասնա ծռեր»- ի գործողություններին՝ Արա Պապյանը նշեց, որ եթե այս զինված ապստամբությունը ճնշվի, հաջորդ քայլերը կլինեն տեռորիստական:
Մանրամասները՝ տեսանյութում: