ԱԺ այսօրվա արտահերթ նիստում շարունակում է քննարկվել «ՀՀ և ՌԴ միջև Հավաքական անվտանգության կովկասյան տարածաշրջանում հակաօդային պաշտպանության միավորված տարածաշրջանային համակարգ ստեղծելու մասին» համաձայնագիրը:
ՀՀԿ խմբակցության ղեկավար Վահրամ Բաղդասարյանն իր ելույթում հայտարարեց, որ այս համաձայնագրում ամեն ինչ պարզ է ու հասկանալի՝ հասկացողների համար. «Ես հայտարարում եմ, որ հանրությունը իրազեկված է, իսկ չորս հոգի ցուցարարը, չորս հոգի ընդդիմախոսները ոչ թե իրազեկված չեն, այլ չեն ցանկանում հասկանալ՝ ինչ էլ բացատրես, մևւնույնն է՝ նրանք ուղղորդված են: Եթե ունենք 4+4+4 ձևաչափ, հիմա կարող ենք ստեղծել՝ 4+4+114, որտեղ 114-ը այս համաձայնագրի կողմնակիցներն են»:
Նրա խոսքով՝ մարդիկ ունեն իրենց կողմնորոշումը, սակայն թույլ չեն տա, որ որոշ մարդկային խմբեր որոշեն երկրի ճակատագիրը. «Նրանք, որոնք դեմ են, երբ խոսքը գնում է ԵՏՄ-ի, ՀԱՊԿ-ի, ՀՕՊ-ի մասին, մարդիկ, որոնք դեմ են, երբ խոսքը գնում է ԵՄ-ի ու ՆԱՏՕ-ի մասին. մենք չենք կարող մեր երկրի ճակատագիրը տանք այդ մարդկային խմբերին:
Ես խնդրում և հորդորում եմ, ռուսներին սիրում ես, թե չես սիրում, աղջիկ ջան ( խոսքն ուղղեց Զարուհի Փոստանջյանին), ում ոնց ես սիրում, ինչ ես սիրում, ձեր քաղաքական սեքսուալ հնարավորությունները մի՛ տեղափոխեք Ազգային ժողով, սա պատկառելի ամբիոն է, ես չէի ցանկանա, որ նման համաձայնագրի քննարկումը նման մակարդակ կրեր խորհրդարանում:
Եթե կան որոշ մարդիկ, կամ խմբեր, որոնք ցանկանում են Հայաստանը մեկուսացնել, դա անհնարին է, և այսուհետ ոչ միայն ՀՕՊ համաձայնագիրը, այլ ցանկացած տիպի համաձայնագիր, պայմանագիր, որը կնպաստի մեր երկրի անվտանգությանը, կվավերացնենք՝ առանց հաշվի առնելու այդ մարդկային խմբերի կարծիքները»:
Հ. Բաղդասարյանը հայտարարեց, որ ՀՕՊ համաձայնագիրն ընդունելով՝ մենք չենք կորցնում մեր ինքնուրույնությունը, այլ մեծացնում ենք մեր հնարավորությունը:
Մանրամասները՝ տեսանյութում: