ԱԺ-ն այսօրվա արտահերթ նիստում շարունակում է քննարկել «ՀՀ և ՌԴ միջև Հավաքական անվտանգության կովկասյան տարածաշրջանում հակաօդային պաշտպանության միավորված տարածաշրջանային համակարգ ստեղծելու մասին» համաձայնագիրը:
«Ժառանգություն» խմբակցության պատգամավոր Զարուհի Փոստանջյանն իր ելույթում հայտարարեց, որ այլևս անկախ քաղաքականություն չենք վարում. «Գնացել են Մոսկվա ու մեր անունից հայտարարել այսպիսի համաձայնագրի վավերացման մասին: Դարձել ենք ՌԴ արբանյակը: Իհարկե, ՌԴ-ն իր շահերը, ու նաև չեն փոխվել ՌԴ ու Թուրքիայի եղբայրության, բարեկամության՝ 1921թ. պայմանագրի դրույթները, որոնք վերաբերում էին մեր տարածքներն: ՌԴ-ն ոչ թե օգնելու է մեզ, այլ ընդհակառակը՝ ցանկացած պահի, ինչպես ժամանակին հանձնել է մեր տարածքները, Կարսում գտնվող մեր զինամթերքը չի օգտագործվել, այդպես էլ հիմա է տեղի ունենում»:
Ըստ նրա՝ ապրիլյան քառօրյա պատերազմի ժամանակ որևէ արձագանք չեղավ ՀԱՊԿ-ի կողմից. «Ամպագոռգոռ գոռում եք, որ այդ ուղղաթիռները թռչելու են, ո՞վ է ձեզ թույլ տալու, որ ուղղաթիռ թռցնեք, դուք ո՞վ եք, դուք ընդամենը արբանյակ եք, ձեր ղեկավարությանը ՌԴ են կանչում ու նա այնտեղից հայտարարություններ է անում: Դառնալով արբանյակ՝ կորցրել ենք մեր բոլոր այլընտրանքային հնարավորությունները: Ու ուզում եք, որ ինչ-որ մեկը մեզ զե՞նք վաճառի այսքանից հետո: Մենք քաղաքական, ռազմական վերահսկողության տակ գտնվող տարածք ենք ու այս դահլիճում գտնվող բոլոր ուժերը ՌԴ քաղաքականության տակ են, ու ինքներդ եք հրաժարվել բոլոր այլընտրանքներից»:
Զարուհի Փոստանջյանի խոսքով՝ տնտեսական ու ռազմական առումով մենք մեզ փակուղու մեջ ենք գցել, նրա համոզմամբ՝ մենք շուտով դառնալու ենք թատերաբեմ՝ ռազմական գործողությունների համար:
Մանրամասները՝ տեսանյութում: