Ֆրանսիացիների մեծ մասը համարում է, որ երկրի իշխանությունները հաշվի չեն առնում իրենց կարծիքը: Այսպիսին են Elabe ֆրանսիական սոցիոլոգիական ինստիտուտի հարցման արդյունքները՝ հայտնում է TASS-ը:
Հարցման տվյալներով՝ Ֆրանսիայի քաղաքացիների միայն 20%-ն է նշել, որ նախագահ Ֆրանսուա Օլանդը և վարչապետ Մանուել Վալսը «լսում են» բնակչության կարծիքը: Ֆրանսիացիների միայն 16%-ն է վստահ, որ պետության և կառավարության ղեկավարների գործողությունները համապատասխանում են այն մարտահրավերներին, որոնց առջև ներկայումս կանգնած է երկիրը:
Այս արդյունքները հրապարակվել են չորեքշաբթի՝ բառացիորեն մի քանի ժամ անց այն բանից, երբ Ֆրանսիայի Ազգային ժողովը հաստատել է սահմանադրական բարեփոխման նախագիծը, որը նախաձեռնել են իշխանությունները և անձամբ նախագահ Օլանդը՝ Փարիզում նոյեմբերի 13-ի ահաբեկչություններից հետո: Առաջարկված օրինագծերը կոչված են ահաբեկչության դեմ պայքարն ավելի արդյունավետ դարձնելու:
Բարեփոխումը ենթադրում է երկու առանցքային նորամուծություն՝ ահաբեկչական գործունեությանը մասնակից անձանց Ֆրանսիայի քաղաքացիությունից զրկելու հնարավորություն և սահմանադրության մեջ դրույթի ներմուծում երկրում կառավարության կողմից արտակարգ դրություն սահմանելու հնարավորության մասին (ներկայումս դրա համար պահանջվում է նախագահի հատուկ որոշումը):