Քաղաքագետ Աղասի Ենոքյանը «Առաջին լրատվական»-ի հետ զրույցում անդրադառնալով այսօր ՀՀԿ-ՀՅԴ ձեռք բերված համաձայնությանը՝ նշեց, որ, ըստ տրամաբանության, պաշտոնները պետք է հանձնվեին Դաշնակցությանը, և այդ կուսակցությունը ինքը պետք է դրանք բաշխեր իր անդամների միջև, բայց հայաստանյան իրողության մեջ բոլորովին այլ է:
Դիտարկմանը՝ սակայն Դաշնակցության ներսում կան գործիչներ, ովքեր Հանրապետական կուսակցության տարբեր թևերի՝ Սերժ Սարգսյանի կամ Հովիկ Աբրահամյանի հետ ունեն առանձնահատուկ շփումներ, և այս նշանակումները ևս ինչ-որ առումով առնչվում են այդ թևերին, քաղաքագետն ասաց. «Այսպես ասենք՝ հանրապետականն ունի իր դաշնակցականներին, որոնց ինքը վստահում է՝ լինելու իր կառավարության մեջ: Եվ բնականաբար, այդ անունները նույնպես համաձայնեցված են: Սակայն երևի հարիր կլինի, որ այդ անունները հնչեցնի Դաշնակցությունը»:
Աղասի Ենոքյանը չի բացառում նաև, որ Սերժ Սարգսյանն ու Հրանտ Մարգարյանը կարող են համատեղ հայտարարությամբ հանդես գալ այն հարցի շուրջ, թե որ պաշտոններն են տրվել ՀՅԴ-ին:
Այն, որ այսքան ձգձգվեց այս համաձայնությունը, որի արդյունքում Հանրապետականը ի վերջո տեղի տվեց և հանձնեց երրորդ նախարարական պորտֆելը, նշանակում է՝ «այս կոալիցիան Հանրապետականին շատ էր պետք»՝ կարծում է մեր զրուցակիցը: