Հունաստանի կառավարության ընտրությունը Իրանի հետ ռազմավարական բնույթի կապերի զարգացումն է՝ հայտարարել է Հունաստանի վարչապետ Ալեքսիս Ցիպրասը Թեհրանի տեխնոլոգիական պարկ այցի ժամանակ։ Այս մասին փոխանցում է RIA Novosti-ն։
Ցիպրասը երկօրյա պաշտոնական այցով Իրանում է։ Հունաստանի վարչապետը առաջին օտարերկրացի առաջնորդն է, ով պատժամիջոցների վերացումից հետո այցելել է Թեհրան։
«Հունաստանը կդառնա էներգետիկ, տնտեսական և առևտրային կամուրջ Իրանի և ԵՄ-ի միջև»,- ասել է Հունաստանի վարչապետը։
Ինչպես հայտնում է Mega հեռուստաալիքը՝ վարչապետը նշել է, որ երկու երկրները կարող են համագործակցել տեխնոլոգիաների և ինովացիաների, էներգետիկայի, առևտրի, մշակույթի և ծովագնացության ոլորտներում։
Տեխնոլոգիական պարկի տնօրեն Մահդի Սաֆարինիան ասել է, որ Ցիպրասը ամենաանկախ առաջնորդն է Եվրոպայում։
Նա հրավիրել է հետազոտությունների ու տեխնոլոգիաների ոլորտում գործող հունական ձեռնարկությունների՝ մասնակցելու մեծ ցուցահանդեսին, որը մայիսին կանցկացվի Իրանում։
Հունաստանի վարչապետի այցի ծրագրի հիմնական մասը կսկսվի այսօր։ Ցիպրասը կհանդիպի Իրանի ղեկավարության հետ՝ ներառյալ այաթոլլա Ալի Խամենեիի։ Այցի շրջանակում նախատեսվում է մի շարք համաձայնագրերի ստորագրում։
Հունաստանն արդեն ստորագրել է Իրանի հետ նավթի հումքի մատակարարումը վերսկսելու մասին առաջին համաձայնագիրը՝ պատժամիջոցների վերացումից հետո։ Նախկինում Հունաստանի նավթային ներկրման 1/3-ը բաժին է ընկել Իրանին։
