ԱՄՆ իշխանությունները համաձայնության են եկել բրիտանական ֆինանսական HSBC կոնգլոմերատի հետ, որի շրջանակում վերջինս որպես տուգանք 470 մլն դոլար կվճարի 2008-ի ֆինանսական ճգնաժամից առաջ հիփոթեքային վարկավորման ծրագրերով թույլ տված խախտումների համար։ Այս մասին հայտնում է BBC-ն։
Դաշնային բյուջեի օգտին անմիջական տուգանքի չափը կազմում է 100 մլն դոլար, իսկ մնացած 370 մլն դոլարը կուղղվի բանկի գործողությունների հետևանքով տուժածներին։
HSBC-ի դեմ հետաքննությունը տարվում է 2010 թվականից, երբ բանկին կասկածել են հիփոթեքով ձեռք բերված տներից պարտապանների վտարման վերաբերյալ գործերի անբարեխիղճ ստուգման մեջ։ Նման գործողություններից հազարավոր ամերիկացիներ են տուժել։
Ավելի վաղ ԱՄՆ-ը համանման տուգանքների մասին էր պայմանավորվել այլ խոշոր ֆինանսական հաստատությունների՝ JP Morgan-ի և Bank of America-ի հետ։ HSBC-ն անձամբ ավելի վաղ տուգանք էր վճարել փողերի լվացման և Իրանի ու Կուբայի նկատմամբ սահմանված պատժամիջոցային ռեժիմի խախտման համար։
