ԵԱՀԿ Մինսկի խմբի ամերիկացի համանախագահ, դեսպան Ջեյմս Ուորլիքը նախորդ ամիս մեկնել էր Լոնդոն՝ Միացյալ Նահանգների «ամենասերտ դաշնակցի հետ Լեռնային Ղարաբաղի հակամարտության բոլոր ասպեկտները քննարկելու նպատակով»: Այս մասին նա ասել է՝ պատասխանելով «Առաջին լրատվական»-ի հարցերին:
«Մեծ Բրիտանիայի կառավարությունը Միացյալ Նահանգների հետ սերտորեն համակարգում է աշխատանքները ԵԱՀԿ-ում և այլ կառույցներում»,- նշել է համանախագահը:
Դեսպանը անդրադարձել է նաև վերջերս ԼՂ հիմնախնդրի թեմայով Վաշինգտոնում կայացած քննարկմանը: Դեսպան Ուորլիքին խնդրել էինք նաև մեկնաբանել հարցը, թե Ադրբեջանի ներքին խռովություններն ի՞նչ վտանգ են պարունակում ԼՂ հակամարտության համար, տնտեսական ճգնաժամը կստիպի՞ Ադրբեջանի ղեկավարությանը զերծ մնալ շփման գծում լարվածություն հրահրելուց, թե՞ ընդհակառակը՝ Ալիևի ռեժիմը կօգտագործի ղարաբաղյան խաղաքարտը և սահմանին բախումներ հրահրելու միջոցով կփորձի շեղել մարդկանց ուշադրությունը ներքին խնդիրներից:
Ի պատասխան՝ Ջեյմս Ուորլիքը հորդորել է դիմել Բաքվում ԱՄՆ դեսպանատանը:
– Պարոն դեսպան, Թվիթերում գրել էիք, որ հունվարի 20-ին «հրաշալի քննարկումներ» են անցկացվել Լեռնային Ղարաբաղի հակամարտության և խաղաղության թեմայով: Այս անգամ, սակայն, նշված չէր, թե ինչ ձևաչափի քննարկում է եղել և ինչ բնույթի հարթակում է այն կայացել:
– Լեռնային Ղարաբաղի հակամարտության վերաբերյալ մեկ ամբողջ օր քննարկումներ տեղի ունեցան Վաշինգտոնում՝ փորձագետների լայն շրջանակի մասնակցությամբ: Նման քննարկումներն օգտակար են: Քննարկումն ընթանում էր տեղեկատվության աղբյուրի անանունության ապահովման՝ Չեթեմ-հաուզի սկզբունքով:
– Հունվարի 12-ի Ձեր ուղևորությունը Լոնդոն բավական ուշագրավ էր: Ի՞ նչ տվեց Մեծ Բրիտանիայի արտաքին գործերի նախարարության հետ խորհրդատվությունը ԼՂ հակամարտության խաղաղ կարգավորման գործընթացին: Ընդհանրապես, ինչո՞վ է պայմանավորված Լեռնային Ղարաբաղի հարցը Մեծ Բրիտանիայի արտաքին գործերի նախարարության հետ քննարկելը:
– Մեծ Բրիտանիայի կառավարությունը Միացյալ Նահանգների հետ սերտորեն համակարգում է աշխատանքները ԵԱՀԿ-ում և այլ կառույցներում: Լոնդոն իմ այցի նպատակը մեր ամենասերտ դաշնակցի հետ Լեռնային Ղարաբաղի հակամարտության բոլոր ասպեկտների քննարկումն էր:
Ես նաև հանդիպում ունեցա բրիտանական «Conciliation Resources» (Հաշտության ռեսուրսներ,- խմբ.) հասարակական կազմակերպության հետ, որը հայտնի է հակամարտության վայրերում իր իրականացրած ժողովրդական դիվանագիտության գերազանց ծրագրերով:
Լուսանկարը՝ Panorama.am-ի
