Բրիտանական բանտում 11 տարի և 40 օր անցկացնելուց, ապա արդարացվելուց հետո 15 տարի առաջ ազատության մեջ հայտնված դոկտոր Մայքլ Օ՛Բրայենը իր անմեղությունն ապացուցելու համար ստիպված է եղել անազատության մեջ իրավաբանություն ուսանել։ 11 տարի ճաղերի հետևում անցկացնելուց հետո միայն Օ՛Բրայենին հաջողվել է ապացուցել, որ ինքն ազատազրկման է դատապարտվել դատական սխալի պատճառով։ Այսօր նա Հայաստանում էր և հայաստանյան իրավապաշտպան կազմակերպությունների ներկայացուցիչների հետ քննարկում էր դատական սխալների հարցը մեր երկրում։
Մայքլ Օ՛Բրայենի խոսքով՝ դատական սխալներ բոլոր երկրներում էլ արձանագրվում են։ Հայաստանում նրան ծանոթ է հատկապես ցմահ ազատազրկման դատապարտված Մհեր Ենոքյանի գործը։ Նրա համոզմամբ՝ Մհեր Ենոքյանն անմեղ է, իսկ եթե նա նույնիսկ կատարել է իրեն վերագրվող հանցանք սպանությունը, ապա Բրիտանիայում նա երբեք ցմահ ազատազրկման չէր ենթարկվի։ Եվ հիմա Հայաստանում իրենք, համագործակցելով «Անմեղության հայկական ծրագիր» ՀԿ-ի հետ, հենց այդ գործի վրա են աշխատում։
«Անմեղության հայկական ծրագիր» ՀԿ-ի համահիմնադիր, հետաքննող լրագրող Զարուհի Մեջլումյանի խոսքով՝ Հայաստանում դատական սխալների մասին թեմաների վրա տաբու է դրված։ Ըստ Մեջլումյանի՝ այդ է պատճառը, որ իր բոլոր հետաքննություններով բացահայտված կամ նոր երևան եկած հանգամանքները ցմահ ազատազրկվածների գործերով մերժվում են դատախազության կողմից։ Մինչդեռ Զարուհի Մեջլումյանի ջանքերով, քրեադատավարական նոր օրենսգրքով սահմանվել է, որ քրեական գործերով իրեղեն ապացույցները չպետք է ոչնչացվեն։
Հելսինկյան կոմիտեի փաստաբան Ռոբերտ Ռևազյանի խոսքով՝ անկախ այսպիսի քննարկումներից, միայն անհրաժեշտ քաղաքական կամքի առկայությամբ է հնարավոր դատական սխալներ պարունակող գործերի վերաբացումը։