Գյումրու ռուսական 102-րդ ռազմաբազայում շարունակվում է Ավետիսյանների սպանության մասով դատաքննությունը:
Մահացած Հասմիկ Ավետիսյանի քույրը՝ Ռիտա Պետրոսյանը, այս պահին շարունակում է ցուցմունքը: Նա հայտարարեց, որ կասկածելի է եղել, որ այդ օրը ոչ մի հարևան իր առջև դուռը չի բացել, երբ ինքը, հայտնաբերելով սպանվածներին, վազել է առաջին օգնության: Ստիպված է եղել վազել մոտակա խանութ. սկզբում մտածել է՝ գազից են խեղդվել, բայց երբ եկել է շտապօգնության մեքենան, իրեն ասել են, որ զենքով են սպանել հարազատներին…
Ռիտա Պետրոսյանն այնքան է խառնված եղել, որ չի հասկացել անգամ, որ փոքրիկ Սերյոժան ողջ է:
Տուժողի իրավահաջորդի ներկայացուցիչ Արթուր Սաքունցը հետաքրքրվեց՝ արդյոք հարևանների մեջ կա՞ն ռուսական ռազմաբազայի հետ առնչություն ունեցող մարդիկ, ինչին ի պատասխան Ռիտա Պետրոսյանն ասաց, որ տեղյակ չէ: «Գուցե իմանայինք՝ գազից են խեղդվել, այսքան ծանր չէինք տանի»,- ասաց նա՝ հավելելով, որ հարևանները մոտեցել են միայն շտապօգնության մեքենայի գալուց հետո և հայտարարել են, որ քնած են եղել և ոչինչ չեն լսել: