ԱՄՆ-ը հույս ունի, որ Հայաստանի և Ադրբեջանի նախագահների հանդիպումը, որը նշանակված է դեկտեմբերին, կակտիվացնի ԼՂ հակամարտության կարգավորման շուրջ երկխոսությունը։ Այս մասին Azernews-ին տված հարցազրույցում ասել է Պետդեպի ներկայացուցիչը։
«Մենք հույս ունենք, որ կողմերը կնվազեցնեն լարվածությունն ու կշարունակեն կարգավորման տարրերի շուրջ քննարկումը։ Մենք նաև հույս ունենք, որ կողմերը կհաստատեն Մինսկի խմբի շրջանակում բանակցությունների հիման վրա խաղաղ կարգավորման ձեռք բերման հանձնառությունը և կհամաձայնեն ակտիվացնել երկխոսությունը 2016 թվականին»,- ասել է նա։
Պետդեպի ներկայացուցիչը նշել է, որ կողմերի միջև վերջին էսկալացիան և ծանր սպառազինության կիրառումն անընդունելի են։ «Մենք կողմերին կոչ ենք անում խստորեն պահպանել հրադադարի ռեժիմը»,- ասել է նա։
Վերջինս նաև նշել է, որ ԱՄՆ-ն աջակցում է շփման գծի և հայ-ադրբեջանական սահմանի երկայնքով բռնության սպառնալիքի նվազեցման առաջարկներին, և Մինսկի խմբի ամերիկացի համանախագահ Ջեյմս Ուորլիքը ռուս և ֆրանսիացի գործընկերների հետ շարունակում է քննարկել այդ միջոցառումները հակամարտող կողմերի հետ։
«Լարվածության նվազեցման ևս մեկ միջոց է շփումների մեծացումը մարդկանց միջև՝ հատկապես Լեռնային Ղարաբաղի համայնքների շրջանում։ Հայերն ու ադրբեջանցիները կողք կողքի ապրել են մի քանի սերունդներ։ Խաղաղության հասնելու համար նրանք պետք է կրկին վստահեն միմյանց»,- ասել է Պետդեպի ներկայացուցիչը։
Նրա խոսքով՝ վերջին հաշվով խաղաղության համար պատասխանատվությունը դրվում է երկու երկրների նախագահների ուսերին։ «Նրանք պետք է համարձակ քայլ ձեռնարկեն այդ վաղեմի հակամարտության խաղաղ կարգավորման համար իրենց երկրների նախապատրաստման ուղղությամբ։ Մենք հույս ունենք, որ առաջիկա գագաթնաժողովը կողմերին կմոտեցնի հակամարտության լուծման և կխթանի խաղաղ գործընթացը»,- ասել է Պետդեպի ներկայացուցիչը։
Նա նշել է, որ ԱՄՆ-ը՝ որպես Մինսկի խմբի համանախագահ, նախկինի պես լիովին հավատարիմ է հակամարտող կողմերի հետ միջնորդական աշխատանքին՝ դրա կարգավորման համար, սակայն նոր, խաղաղ դարաշրջան մուտք գործելու որոշումը պետք է ընդունեն հակամարտող կողմերը։