Հայաստանում ԱՄՆ դեսպանությունը «Առաջին լրատվական»-ի խնդրանքով մեկնաբանել է դեկտեմբերի 14-ի հայտարարությունը սահմանադրական հանրաքվեի վերաբերյալ:
ԱՄՆ դիվանագիտական ներկայացուցչությունն այս շաբաթվա սկզբին երկրորդ անգամ էր անդրադարձել Հայաստանում դեկտեմբերի 6-ին տեղի ունեցած քվեարկությանը և հատկապես ընտրախախտումներին՝ նշելով, որ իրենք շարունակում են հետևել քվեների վերահաշվարկի ընթացքին և վերահաստատում են, որ «խախտումների համար պատասխանատուների նկատմամբ քննություններն ու դատական կարգով հետապնդումները պետք է լինեն թափանցիկ ու հրապարակային, որպեսզի Հայաստանի ժողովրդի մեջ վստահություն լինի ընտրական գործընթացի անաչառության վերաբերյալ»:
Հայկական մամուլի ուշադրությունը գրավեց հայտարարության հատկապես հետևյալ պարբերությունը, որում դեսպանատունը, ըստ էության, ընտրախախտումների երևույթը ներկայացնում է որպես կոռուպցիայի դրսևորում. «Հաշվի առնելով այն հանգամանքը, որ Միացյալ Նահանգները աշխարհով մեկ պայքարում է կոռուպցիայի դեմ, դեկտեմբերի 6-ի հանրաքվեի անաչառ անցկացմանն ուղղակիորեն միջամտած անձանց մասին հրապարակումներում տեղ գտած տեղեկությունները կարող են նաև կիրառվել ԱՄՆ դեսպանատան կողմից՝ դեսպանության ծրագրերում ու միջոցառումներում մասնակիցների ներգրավումը դիտարկելիս»:
Սա նշանակում է, որ Միացյալ Նահանգները կարող է անհատական պատժամիջոցնե՞ր սահմանել ընտրախախտումների մեջ ներգրավված անձանց, պաշտոնյաների նկատմամբ, ասենք, «Մագնիտսկու ցուցակի» օրինակով:
Մեր այս հարցադրմանը դեսպանատնից պատասխանել են. «Մեր հայտարարության մեջ մենք կոնկրետ պատժամիջոցների կիրառմանը չենք անդրադառնում, այլ նշում ենք, որ տարբեր հաղորդումներում տեղ գտած տեղեկությունները կարող են հաշվի առնվել ԱՄՆ դեսպանության ծրագրերում ու միջոցառումներում մասնակիցների ներգրավման նպատակահարմարությունը դիտարկելիս»:
Լուսանկարը՝ Armenpress-ի