Եթե Թուրքիայի կառավարությունը չսկսի պայքարել ԴԱԻՇ-ի զինյալների դեմ, շատ շուտով ահաբեկչությունը կհեղեղի Թուրքիայի խոշոր քաղաքների փողոցները, հայտնել է Իրաքի կառավարության անդամ, անվտանգության հարցերով նախկին խորհրդական Մովաֆակ Ռուբաեն RT-ին տված հարցազրույցում:
Պատասխանելով լրագրողի հարցին Էրդողանի ասածի մասին խոցված ռուսական Սու-24 կործանիչի վերաբերյալ, փորձագետը հայտարարել է, որ Թուրքիայի ղեկավարը փորձում է ձեռք բերել ժողովրդականություն սեփական բնակչության մեջ, սակայն դա ոչ մի կերպ չի անդրադառնա ԴԱԻՇ-ին հակազդելու վրա:
«Ես ձեզ մի բան կարող եմ հաստատ ասել` հենվելով իմ սեփական կենսափորձի վրա: Եթե Էրդողանը և նրա կառավարությունը չխոստովանեն և չսկսեն պայքարել ԴԱԻՇ-ի դեմ, ապա շատ շուտով կրակը կհասնի մինչև Ստամբուլ և մենք կտեսնենք պայթող ավտոմեքենաներ, ահաբեկիչ մահապարտներ, ինչպես նաև ահաբեկչական հարձակումների ամենատարբեր դրսևորումներ Ստամբուլի և Անկարայի փողոցներում»,- համարում է Մովաֆակ Ռուբաեն:
Հարցազրույցի ընթացքում նա նաև նշել է, որ վերջին 8 ամիսների ընթացքում ԴԱԻՇ-ի զինյալներին հաջողվել է Թուրքիայի սև շուկայում վաճառել 800 միլիոն դոլարի նավթ: Ռուբաենի տեղեկատվությամբ՝ զինյալները բեռնատարերով Իրաքից և Սիրիայից հասցնում են Թուրքական սահման, որտեղ այն վաճառում են միջազգային գնից 2 անգամ էժան: «Դա թթվածնի նման է` հենց որ դուք դադարեցնեք թթվածնի մատակարարումը, ԴԱԻՇ-ը կխեղդվի»,- ասում է Ռուբաեն:
