Ավան և Նորք-Մարաշ վարչական շրջանների ընդհանուր իրավասության դատարանում այսօր կրկին հետաձգվեց կուրսանտ Հայկազ Բարսեղյանի սպանության գործով նիստը։ Այս անգամ ևս մեղադրյալներից Վարազդատ Սաֆարյանը և իր պաշտպանը չէին ներկայացել դատարան, թեպետ պատշաճ ծանուցված էին։ Դատավորն աննպատակահարմար համարեց նրանց բացակայությամբ դատական նիստը շարունակելը։
Այսօր դատարան չէին ներկայացել նաև Հայկազ Բարսեղյանի ծնողները։ Նրանց փաստաբանն ասաց, որ ինքն է հորդորել այս անգամ դատարան չգալ՝ հոգեկան ծանր ապրումներից զերծ մնալու համար։
Արկադի Բարսեղյանը, սակայն, դատարանին դիմում էր ներկայացրել այն մասին, որ ամբաստանյալների հարազատների կողմից իրենց ընտանիքի հասցեին սպառնալիքներ են հնչում։ Դատարանը փաստաբանին հորդորեց նման փաստի առկայության պարագայում ավելի մանրամասն ինֆորմացիա ներկայացնել։
Դատական նիստի ավարտից հետո մեղադրյալներից Գնել Թորոսյանի պաշտպան Արա Զաքարյանը լրագրողների հետ զրույցում նշեց, որ իր պաշտպանյալն անմեղ է, դեպքի օրը որևէ մասնակցություն չի ունեցել կատարվածին, քնած է եղել։ Եվ ինքն ավելի հակված է, որ Հայկազի հետ տեղի ունեցածն ինքնասպանություն է։
Գնելի փաստաբանը հերքեց նաև, թե իր պաշտպանյալը դեպքի օրը խնջույքի է մասնակցել և հարբած է եղել՝ չնայած փորձաքննությունը հաստատել էր, որ նրա արյալ մեջ ալկոհոլ է եղել։
Փաստաբանը նշեց, որ իրենք անհամաձայնություն ունեն նաև Հայկազի դիակի դատաբժշկական փորձաքննության եզրակացության հետ, որը իրենք համարում են ոչ օբյեկտիվ։
Տուժողի հարազատների պաշտպան Գևորգ Գալիկյանն էլ պնդեց, որ ինքնասպանության վարկածը բացառված է։
Դատական հաջորդ նիստը նշանակված է դեկտեմբերի 10-ին:
