Աջափնյակ և Դավթաշեն վարչական շրջանների ընդհանուր իրավասության դատարանում Մարինե Մելքոնյանի նախագահությամբ շարունակվեց Էդգար Պետրոսյանի գործի դատական քննությունը:
Ըստ մեղադրանքի՝ 29-ամյա Էդգար Պետրոսյանը իր կողմից շահագործվող մեքենայով տաքսու ծառայություններ է մատուցել Թուրքիայի քաղաքացի Հալիլ Իչին:
Հերթական անգամ նրան տեղափոխելու ժամանակ Էդգարը, դուրս գալով ճանապարհի երթևեկելի մասից, դանակ է հանել ու մոտեցրել ուղևորի պարանոցին:
Վերջինս, իրական ընկալելով իր կյանքի և առողջության դեմ ուղղված սպառնալիքը, տագնապի ու վախի ապրումներ է ունեցել, բայց կարողացել է դանակը խլել վարորդի ձեռքից, ապա դուրս գալ մեքենայի սրահից ու փախչել:
Էդգար Պետրոսյանը միացրել է մեքենայի լուսարձակները, հետապնդել ու դիտավորությամբ վրաերթի է ենթարկել փախչող ուղևորին՝ նրա առողջությանը պատճառելով ծանր վնաս:
Դեպքը տեղի է ունեցել հանրապետական հիվանդանոցից ոչ հեռու, բայց Էդգարն օգնություն չի ցուցաբերել Հալիլին, միայն, ըստ մեղադրանքի, մոտեցել, գրպանից վերցրել է նրա դրամապանակը, որում գումար և քարտեր են եղել, և մեքենայով փախուստի է դիմել:
Էդգարը բացահայտվել է, երբ տուժողի քարտով փորձել է գումար կանխիկացնել: Բանկոմատի մոտ կատարված տեսանակարահանմանը նա ոչինչ հակադրել չի կարողացել:
Էդգար Պետրոսյանին մեղադրանք է առաջադրվել տուժողի առողջությանը դիտավորությամբ ծանր վնաս հասցնելու և տուժողին սպանության սպառնալիք տալու համար՝ ՀՀ քրեական օրենսգրքի 112 հոդվածի 1-ին և 137 հոդվածի 1-ին մասերով:
Էդգար Պետրոսյանի խափանման միջոցը ստորագրությունն է չհեռանալու մասին:
Տուժողը Թուրքիայի քաղաքացի է՝ Հալիլ Ֆերմանի Իչ անուն-ազգանունով, բայց նա հայ է: Սասունցի է, մկրտված է հայ առաքելական եկեղեցում, նրա հայկական անունը Սարգիս է:
Սարգիսը Թուրքիայի քաղաքացի է, միաժամանակ Հայաստանում ունի կացության իրավունք:
Նա Հայաստանում բիզնես-գործունեություն է վարում:
Ըստ տուժողի՝ իր ու ամբաստանյալ Էդգարի միջև պարտքուպահանջային հարցեր չեն եղել:
Էդգարը տուժողին տաքսու ծառայություններ է մատուցել: Տուժողի կարծիքով՝ ամբաստանյալը, տեղեկանալով, որ ինքը պատրաստվում է Հայաստանից մեկնել, որոշել է դանակի սպառնալիքներով գումար պահանջել: Եվ նա դանակ է հանել, դրել է իր կոկորդին, ցանկացել է վերցնել իր մոտ եղած գումարը:
Ինքը խլել է դանակը, միաժամանակ այդ դանակով Էդգարին չի վնասել, այլ դուրս է փախել մեքենայից, մի քիչ սպասել է, ապա սկսել է վազելով հեռանալ… Էդգարը մեքենայով հետապնդել ու վրաերթի է ենթարկել իրեն…
Դատարանը հարցաքննեց Հայաստան ժամանած ու դատարան ներկայացած տուժողին: Վերջինս խոսում է թուրքերեն, հարցաքննությունը կատարվեց անփորձ թարգմանի մասնակցությամբ:
Տուժողը նշեց, որ ամբաստանյալ Էդգարի հետ թշնամական հարաբերությունների մեջ չէ, միայն թե նա հանցավոր արարք է կատարել ու պիտի պատասխան տա:
Տուժողն արդեն տասը տարի Հայաստան է գնում-գալիս, տարբեր ծրագրեր է իրականացնում:
Ամբաստանյալ Էդգարի հետ մինչև դեպքը առնչվել է մեկ անգամ՝ դեպքից երկու-երեք օր առաջ:
Փողոց է դուրս եկել, տաքսի է կանգնեցրել: Դա եղել է Էդգարի տաքսին:
Մեքենայի մեջ կիսահայերեն-կիսաթուրքերեն խոսել են: Տաքսու վարորդը տվել է իր հեռախոսահամարը, որ տաքսի պետք լինելու դեպքում Հալիլը զանգի ու հրավիրի իրեն:
Եվ տուժողն ասաց, թե մեկ անգամ՝ մի քանի օր անց, ինքն օգտվել է այդ հեռախոսահամարից, ու դա եղել է հենց դեպքի օրը:
Ինքը գտնվել է Օպերայի տարածքի սրճարաններից մեկում: Իրեն տաքսի է պետք եղել, զանգել ու կանչել է Էդգարին: Նա եկել է այդ սրճարան, ինքը նրան առաջակել է նստել ու սուրճ խմել իր հետ՝ ճամփա ընկնելուց առաջ: Այդ սրճարան իր կանչով եկել է նաև իր քեռին, ով տեսել է Էդգարին, ծանոթացել է նրա հետ:
Տուժողն ասաց, թե սրճարանում իրենք առանձնապես չեն խոսել: Էդգարն անընդհատ խոսել է հեռախոսով, տվել է աղջիկների անուններ, ինքը չի հասկացել, թե նա ինչ է խոսում:
Այնուհետև, ըստ տուժողի, ինքը նստել է Էդգարի տաքսին: Առաջարկել է, որ միասին գնան հաց ուտելու, հարցրել է, թե ի՞նչ լավ տեղ կարող է տանել Էդգարը: Վերջինս ասել է, թե լավ տեղ կա Դավթաշենում:
Տուժողը պնդեց, որ ինքը Էդգարի հետ որևէ գործ չի ունեցել, նրանից պարտքով փող չի վերցրել: Իր համար Էդգարն ընդամենը տաքսու վարորդ էր, ինքը նրանից չէր կարող փող խնդրել: Ոչ էլ ուղեվարձի պարտք է ունեցել:
Ճանապարհին՝ դեպի Դավթաշեն գնալիս, Էդգարն ասել է, թե ընկերոջը պիտի վերցնի: Հեռախոսով զանգել, ինչ-որ բան է խոսել: Ապա հիմնական ճանապարհից դուրս է եկել: Կանգնել ու սկսել է սպասել ընկերոջը:
10-15 րոպե սպասել են: Եկել է ընկերը, ում դեմքը տուժողը ներկայումս չի հիշում: Տուժողը նստած է եղել վարորդի կողքին, իսկ Էդգարի ընկերը նստել է հետևի նստատեղին՝ վարորդի հետևի մասում:
Ընկերոջ նստելուն պես, ըստ տուժողի, վարորդ Էդգարը ձախ ձեռքով դանակը մոտեցրել է իր պարանոցին: Տուժողը ենթադրեց, թե դանակը կարող էր բերած լինել Էդգարի ընկերը, միգուցե նա ընկերոջը հենց դրա համար էր սպասում:
Դանակի շեղբը, ըստ տուժողի, եղել է իր պարանոցի մոտ, բայց ինքը դանակից քերծվածք կամ այլ վնասվածք չի ստացել:
Էդգարը այդ ժամանակ հայերեն ինչ-որ բան է խոսել, բայց տուժողն ասում է, թե ոչինչ չի հասկացել նրա ասածից:
Էդգարի գործողությունից ենթադրել է, թե գումար է պահանջում՝ իմանալով, որ ինքը գործարար է, ուրիշ ինչի՞ համար պիտի դանակը դներ իր պարանոցին: Կոնկրետ սպանության սպառնալիք տուժողը չի հասկացել Էդգարի խոսքից, դրա մասին ենթադրել է նրա արարքից:
Տուժողն ասաց, թե ինքը, իրական վտանգ զգալով իր կյանքի համար, ձախ ձեռքով բռնել ու իրենից հեռացրել է Էդգարի ձեռքը, որում դանակն էր, ապա իր աջ ձեռքով կարողացել է Էդգարից խլել դանակը:
Այդ ընթացքում հետևի նստատեղին նստած ընկերը ոչ մի գործողություն չի կատարել:
Դանակը Էդգարի ձեռքից խլելուն պես տուժողը դուրս է եկել մեքենայից: Նա անմիջապես չի հեռացել, իր ասելով՝ դանակը վերցնելով՝ ենթադրել է, թե վտանգն անցել է, ու սպասել է, որ Էդգարը մեքենան քշի-հեռանա: Բայց տեսնելով, որ նա չի հեռանում, ինքը սկսել է վազել հետ՝ դեպի Երևան:
Էդգարը մեքենայով շրջադարձ է կատարել: Դա երթևեկելի ճանապարհ չէր, հանդիպակաց մեքենաներ չկային:
Էդգարը նույն այդ ճանապարհով հետապնդել է վազող տուժողին ու մեքենայի առջևի կենտրոնական մասով հարվածել է նրա մարմնին:
Տուժողն ասաց, թե այդ հարվածից ինքը մի կողմ է ընկել ու կորցրել է գիտակցությունը: Բայց Էդգարը մի անգամ էլ է մեքենայով հարվածել՝ ըստ տուժողի: Ինքը ստացել է ոտքերի, կողերի շրջանների վնասվածքներ, վնասվել է թոքը, առողջությանը պատճառվել է ծանր վնաս:
Տուժողն ուշքի եկել՝ իր կողքին տեսնելով երկու-երեք օտար մարդկանց: Էդգարը այդտեղ չի եղել, նա, տուժողի կարծիքով, մեքենան քշել-հեռացել էր:
Տուժողը ավելի ուշ՝ քեռու հետ հանդիպելուց հետո է նկատել, որ Էդգարը դատարկել է գրպանները՝ տանելով դրամապանակը՝ գումարով, բանկային քարտերով:
Տուժողը նշեց, որ այդ օտար մարդիկ, իրենից իմանալով, որ ինքը Նորքի երկրորդ զանգվածում բարեկամ ունի, այնտեղ է ուզում գնալ, ինչ-որ տաքսիով իրեն ուղարկել են Նորքի երկրորդ զանգված: Ինքը ճանապարհին տեղ-տեղ կորցրել է գիտակցությունը, բայց ի վերջո կարողացել է տաքսու վարորդին հասկացնել, թե որտեղ է քեռու բնակարանը:
Տաքսին կանգնել է քեռու շենքի մոտ, ինքը գոռացել ու կանչել է քեռուն: Քեռին ու քեռեկինը լսել են իր ձայնը, շտապ մոտեցել են: Քեռին է վճարել տաքսու ուղեվարձը, ապա իրեն տեղափոխել է «Սուրբ Գրիգոր Լուսավորիչ» բժշկական կենտրոն, որտեղ իրեն բուժօգնություն է ցուցաբերվել, ինքը ենթարկվել է վիրահատության: Բուժվել է նաև Թուրքիայի հայկական հիվանդանոցում:
Տուժոողը, պատասխանելով ամբաստանյալի շահերի պաշտպանի հարցին, ասաց, թե Էդգարը հանցավոր արարք կատարած անձ է, ինքը ներկայումս նրա հետ ոչ մի հարաբերություն չունի: Ինքը պնդում է, որ նա պետք է պատասխան տա կատարած արարքի համար:
Ամբաստանյալ Էդգարը տուժողին հարցեր չտվեց: Նախագահողի հարցին նա նույնիսկ պատասխանեց, թե չի ցանկանում ցուցմունք տալ:
Ամբաստանյալի շահերի պաշտպանն ասաց, թե իր պաշտպանյալը տվյալ նիստին չի ցանկանում ցուցմունք տալ, իրենք դեռ պետք է քննարկեն ու հստակեցնեն ամբաստանյալի դիրքորոշումը:
Ամբաստանյալն իր հստակ դիրքորոշումը կհայտնի հաջորդ դատական նիստին՝ դեկտեմբերի 21-ին:
