RIA Novosti-ի փոխանցմամբ` Իսրայելը դադարեցնում է ԵՄ ինստիտուտների և ներկայացուցիչների հետ դիվանագիտական կապերը պաղեստինցիների հետ հակամարտության կարգավորման հարցով, հայտնել է Իսրայելի ԱԳՆ ներկայացուցիչը: Միջոցառումը կրում է ժամանակավոր բնույթ և կգործի միայն մերձավորարևելյան խաղաղ գործընթացում ԵՄ դերի ստուգման ընթացքում:
«Իսրայելի վարչապետ և ԱԳ նախարար Բենիամին Նեթանյահուն ԱԳ նախարարությանը կարգադրել է Պաղեստինի հետ քաղաքական գործընթացում ԵՄ ինստիտուտների մասնակցության վերագնահատում կատարել»,- ասված է գերատեսչության պաշտոնական ներկայացուցչի հաղորդագրությունում:
«Վերագնահատման գործընթացի ընթացքում վարչապետը հանձնարարել է դադարեցնել դիվանագիտական կապերը ԵՄ ինստիտուտների և նրանց ներկայացուցիչների հետ»,- նշված է հաղորդագրությունում:
Այդ որոշումը պատասխանն է այն բանի, որ վերջերս Եվրահանձնաժողովը իսրայելյան այն ապրանքների պարտադիր պիտակավորման հրահանգ է տվել, որոնք արտադրվել են օկուպացված տարածքներում` Հորդանան գետի արևմտյան ափին, Գոլանի բարձունքներում և Արևելյան Երուսաղեմում:
ԱԳՆ ներկայացուցիչը պարզաբանել է, որ Իսրայելը Մերձավոր Արևելքի կարգավորման հարցով կշարունակի համագործակցել ԵՄ առանձին երկրների հետ: «Այնպիսիների հետ, ինչպես Գերմանիան, Մեծ Բրիտանիան և Ֆրանսիան, բայց ոչ ԵՄ ինստիտուտների»,- նշել է մամլո քարտուղար Էմանուել Նահշոնը: