«Խորանում է ռուս-թուրքական դիմակայութունը, սակայն, այնուամենայնիվ, թուրքական դիրքորոշումը մեղմացել է: Ռուսաստանը ցույց է տալիս իր վիրավորվածությունը և բավականին ագրեսիվ, կոշտ քաղաքականություն է վարում,- «Առաջին լրատվական»-ի հետ զրույցում նշեց միջազգայնագետ Հայկ Մարտիրոսյանը՝ անդրադառնալով ռուս-թուրքական հարաբերությունների վերջին օրերի զարգացումներին:
«Ռուսաստանը փակեց վիզային ռեժիմը թուրքերի առջև, դա բավականին լուրջ հարված է Թուրքիայի տնտեսությանը: Մյուս կողմից Ռուսաստանը վերանայում է «Թուրքական հոսքը», աշխատանքներ են սկսվում կասեցնելու ուղղությամբ: Դա Թուրքիայի շահերից չի բխում,- նշեց Հայկ Մարտիրոսյանը և հավելեց, որ Ռուսասատանում Կառավարության անդամներին տրվել է հանձնարարականներ մշակել և առաջարկել Թուրքիայի նկատմամբ նոր պատժամիջոցներ սահմանելու վերաբերյալ:
Միջազգայնագետի դիտարկմամբ՝ Ռուսաստանը այս զարգացումներից հետո զգուշավոր կլինի Ադրբեջանին զիջումներ անելու հարցում:
Անդրադառնալով այն հարցին, թե այս իրավիճակում ինչ դիրքորոշում պետք է որդեգրի Հայաստանը, Հայկ Մարտիրոսյանը պատասխանեց. «Երևանը ոչ միայն Ռուսաստանի, այլ նաև Արևմուտքի հետ պետք է գնա ակտիվ համագործակցության Սիրիայում և Իրաքում կատարվող պրոցեսներում մասնակցություն ունենալու համար»:
Միջազգայնագետը նշեց, որ մեր որոշ քաղաքական գործիչներ ասում են, որ մենք պետք է ամեն կերպ զերծ մնանք. «Իրականում դա վնաս է հայկական շահերին, որովհետև մենք զերծ մնալու որևէ տարբերակ չունենք: Մենք պիտի ցույց տանք, որ գործոն ենք և պիտի ներգրավվենք պայքարում: Երրորդ համաշխարհային պատերազմը արդեն ընթացքի մեջ է, և Հայաստանը վաղ թե ուշ ներքաշվելու է դրա մեջ»: