ԱԺ ՀԱԿ խմբակցության ղեկավար, ԵԽԽՎ-ում ՀՀ պատվիրակության անդամ Լևոն Զուրաբյանը լրագրողների հետ զրույցում անդրադառնալով ԵԽԽՎ-ում ստեղծված իրավիճակին և հայաստանյան պատվիրակության աշխատանքներին նշեց. «ԵԽԽՎ-ում կան նաև անկաշառ պատգամավորներ, ովքեր հավատարիմ են եվրոպական, դեմոկրատական արժեքներին և բավականին վրդովված են այն վիճակի պատճառով, որ ստեղծվել է ԵԽԽՎ-ում: Ըստ էության՝ հնարավոր է անկաշառ պատգամավորների հետ համագործակցել ադրբեջանական լոբինգի դեմն առնելու նպատակով»:
Լևոն Զուրաբյանը նշեց երեք կարևոր գործոն, որոնց առկայության դեպքում, նրա խոսքով, հնարավոր կլինի հաջողություն արձանագրել. «Առաջինը՝ ուղերձը պետք է ճիշտ լինի, այսինքն՝ մենք պետք է ոչ թե հայհոյենք կամ ադրբեջանցիներին բուռն արձագանքենք, այլ եվրոպացիների հետ պետք է խոսենք ՄԱԿ-ի անվտանգության խորհրդի բանաձևերի, ԵԱՀԿ-ի փաստաթղթերի, կոնֆլիկտի խաղաղ կարգավորման լեզվով:
Երկրորդը՝ մարտավարությունն է: Շատ կարևոր է հասկանալ, թե ինչի կարող ես հասնել այնտեղ, ինչի չես կարող: Օրինակ՝ ինչ-որ մի պահի պարզ էր, որ Ղարաբաղի վերաբերյալ զեկույցը արդեն պետք է կայանա, ուրիշ տարբերակ չկար, բայց Հայաստանի իշխանությունները շարունակում էին դրա դեմ պայքարել, մինչդեռ պետք էր կենտրոնանալ զեկուցողի անձը և զեկույցի վերնագիրը փոխելու ուղղությամբ:
Երրորդը կոորդինացիայի խնդիրն է: Ցավոք սրտի բացակայում է նախագահի աշխատակազմի, արտգործնախարարության և պատվիրակության միջև կոորդինացիան: Ըստ էության գործում է պատասխանատվությունն իրար վրա գցելու հոգեբանությունը: Արտգործնախարարությունը պատվիրակության վրա է գցում, պատվիրակությունը՝ արտգործախարարության վրա, չկա հստակ կոորդինացիա և որոշումների մեխանիզ»:
