«Հայաստանի Հանրապետության 2016-2018 թվականների պետական վիճակագրական աշխատանքների եռամյա ծրագիրը հաստատելու մասին» նախագծի քննարկման ժամանակ Ազգային ժողովի արտահերթ նիստում ՕԵԿ խմբակցության ղեկավար Հեղինե Բիշարյանը ԱՎԾ պետ Ստեփան Մնացականյանից հետաքրքվեց, թե արդյոք այս ծրագիրը զարգացում ապահովող երկրների փորձ ներառել է, թե՞ ոչ, և մեր նման երկրներն այս ծրագրով կարողացե՞լ են փոսից դուրս գալ, թե՞ ոչ:
«Կառավարությունը բյուջեն պետք է ձևավորի ձեր ներկայացրած ցուցանիշների հիման վրա»,- ասաց նա և նշեց, որ բազմիցս են հանդիպել ուռճացրած թվերի, որոնց հիման վրա կառավարությունը կարող է շեղվել իր ծրագրից:
Հեղինե Բիշարյանը, անդրադառնալով դեկտեմբերի 6-ի սահմանադրության փոփոխությունների նախագծի հանրաքվեին, հետաքրքրվեց, թե քանի մարդ կա, որ կարող է մասնակցել այդ ընտրություններին, քանի որ ներկայացված է, որ Հայաստանում կա 3 միլիոն 200 հազար մարդ, որից 700 հազարը՝ մինչև տասնյոթ տարեկան քաղաքացիներ են:
Ըստ նրա՝ սա ծրագրի կարևոր հարցն է, որը պետք է իրենց հավատ ներշնչեր, սակայն այդ ցուցանիշներն իրենց մտահոգում են, հետևաբար կարծում է, որ պետք է ձեռնպահ մնալ: