«Ոտքի՛, Հայաստան» նախաձեռնությունն այսօրվանից դադարեցնում է Հանրապետության հրապարակում հայտարարած բողոքի ակցիա-նստացույցը, որը տևեց 80 օր։ Այս մասին հայտարարեցին նախաձեռնության անդամները։ Նման որոշման պատճառը ստեղծված «Նոր Հայաստան» հանրային փրկության ճակատն է։
Նախաձեռնության անդամները այս փուլում իրենց առջև դրված խնդիրները համարում են որոշ չափով լուծված։ Նրանք խնդիր ունեին համախմբվել այլ ուժերի հետ արտահերթ նախագահական և խորհրդարանական ընտրությունների մեկ միասնական օրակարգի ձևավորելու շուրջ։ Այժմ «Ոտքի՛, Հայաստան»-ի նպատակն է շարժման շարքերն ամրապնդել և անցնել երկրորդ փուլին՝ հասարակության մոբիլիզացմանը՝ արտահերթ ընտրությունների կազմակերպման համար։
Ինչպես հայտնի է, «Նոր Հայաստան» հանրային փրկության ճակատում ընդգրկված են այն ուժերը, որոնք ավելի վաղ ստորագրել էին սահմանադրական փոփոխությունների դեմ պայքարող «Չեք անցկացնի» նախաձեռնության հռչակագիրը։ Անդրեաս Ղուկասյանը նշեց, որ «Ոչ»-ի ճակատում մնացած մյուս ուժերի, իսկ մասնավորապես «Չեք անցկացնի» նախաձեռնության հետ կան որոշակի տարաձայնություններ։ Նրա խոսքով՝ «Չեք անցկացնի»-ն համարում է, որ պետք է սահմանադրական հանրաքվեն այնպես իրականացնել, որ հասարակությունը գնա և դեմ քվեարկի, որից հետո կանցնեն արտահերթ ընտրությունների օրակարգին։ Իսկ «Նոր Հայաստանը» հակառակ տեսակետն ունի։ Նրանք վստահ են՝ պետք է կազմակերպել արտահերթ նախագահական և խորհրդարանական ընտրություններ և դրանով թույլ չտալ հանրաքվեի իրականացումը։
Ինչպես կհարթվեն մյուս ճակատի հետ այս տարաձայնությունները: Անդրեաս Ղուկասյանն ասաց, որ բանակցություններ են ընթանում։
Ըստ Ղուկասյանի՝ վաղ թե ուշ բոլոր ընդդիմադիր ուժերը, քաղաքացիական նախաձեռնությունները պետք է միանան իրենց ստեղծած ավելի մեծ օրակարգին։ սինխրոն
Այսօր արդեն խոսվում է այն մասին, որ արտահերթ նախագահական ընտրությունների կազմակերպումը երկրորդ նախագահ Ռոբերտ Քոչարյանին շանս կտա առաջադրվելու։ Այս առնչությամբ «Ոտքի՛, Հայաստան» նախաձեռնության մեկ այլ անդամ՝ Դավիթ Հովհաննիսյանը, ասաց՝ դրանք բազմոցային խոսակցություններ են և նպատակ ունեն լղոզելու իրենց պահանջները։
Դավիթ Հովհաննիսյանը նշեց, որ «Չեք անցկացնի» նախաձեռնության հետ հետագա համագործակցությունը պատկերացնում են, սակայն հոկտեմբերի 30-ին Ազատության հրապարակում կազմակերպված հանրահավաքին չեն մասնկացի, քանի որ, ըստ նրա, իրենք չեն պայքարում հետևանքի դեմ։