ՄԻՊ Կարեն Անդրեասյանը հանդես է եկել հայտարարությամբ, որը վերաբերում է հոկտեմբերի 5-ին ԱԺ շենքի մոտ տեղի ունեցած բողոքի ակցիայի ընթացքում ոստիկանության գործողություններին:
«Նախկինում ևս անդրադարձել ենք հավաքների ընթացքում ոստիկանության գործելաոճում զսպվածության և էթիկայի այլ կանոնների պահպանության կարևորությանը, սակայն այս անգամ ևս անթույլատրելի գործողություններ ենք արձանագրել ծառայություն իրականացնող առանձին ոստիկանների վարքագծում, հատկապես Երևանի փոխոստիկանապետ Վալերի Օսիպյանը իր պարտականությունների կատարման ընթացքում չի ցուցաբերել անհրաժեշտ զսպվածություն, որոշակի դեպքերում հուզական վարքագիծ է դրսևորել, անհարգալից է խոսել հավաքի մասնակիցների և նույնիսկ ԱԺ պատգամավորների հետ: Ակնկալում ենք առաջին հերթին ոստիկանության անհապաղ քայլերը միջադեպի մանրամասն քննության և իր աշխատակիցների ոչ իրավաչափ գործողություններին համապատասխան գնահատական տալու ուղղությամբ»,- ասվում է Անդրեասյանի հայտարարությունում:
Իրավապաշտպան Ավետիք Իշխանյանը տեղին և ճիշտ է համարում Կ. Անդրեասյանի հայտարարությունը, սակայն չի կարծում, որ ոստիկանության կողմից որևէ համարժեք քայլ կկատարվի. «Շատ ողջունելի է այս քայլը, սակայն այստեղ այլ խնդիր է այն, որ ՄԻՊ-ը պահանջում է քննություն անցկացնել, դա արդեն կասկած է հարուցում, քանի որ նախկինում կատարած անօրինական գործողությունների համար երբևէ որևէ մեկը պատիժ չի կրել: Տվյալ դեպքում էլ ես մեծ հույսեր չունեմ, որ լուրջ արձագանք կստանա այս զեկույցը»: