Նրանք, ովքեր տնտեսական աճը չեն զգում իրենց մաշկի վրա, ուրեմն մաշկի խնդիր ունեն: Երեկ հայտարարել էր էկոնոմիկայի նախարար Կարեն Ճշմարիտյանը: Նրա համար որոշ ոլորտներում եկամուտների աճ կա, որն էլ, ըստ նախարարի, թույլ է տալիս խոսել ընդհանուր աճի մասին:
Հայաստանի գործատուների հանրապետական միության նախագահ Գագիկ Մակարյանը նախարարին հուշում է՝ հանրությունը մաշկի վրա չի զգում, որովհետև աճի տեմպերը ողորմելի են: Բացի այդ, Գագիկ Մակարյանը Կարեն Ճշմարիտյանին հորդորում է դիմել բժշկի:
Գագիկ Մակարյանը նաև ընդգծում է՝ կարևոր է հասկանալ այն, որ աճը քողարկման միտումներով է, որի մասին, չգիտես ինչու, չեն խոսում: Կառավարության անդամների համար ուղղակի նվեր է եղել այն, որ Հայաստան Ցեղասպանության 100-ամյակի միջոցառումների հետ կապված մեծ թվով զբոսաշրջիկներ են եկել:
«Հայրենական ապրանք արտադրողների միության» նախագահ Վազգեն Սաֆարյանն էլ նկատում է՝ աճի մասին խոսելիս չպետք է մոռանալ նաև, որ եկամուտների հավաքագրման մասով նախորդ տարվա ցուցանիշից ավելի գումար չի հավաքվելու , բայց ծախսային հատվածը 68 մլրդ դրամով ավելին է լինելու. դա նշանակում է, որ բյուջեի պակասը պետք է լրացվի արտաքին ռեսուրսներ ներգրավելով, և պակասուրդը կազմելու է մոտ 190 մլրդ դրամից ավելի, նախորդ տարվա 114 մլրդ դրամի փոխարեն:
Թե՛ Գագիկ Մակարյանը և թե՛ Վազգեն Սաֆարյանը կարծում են, որ տնտեսական քաղաքականության փոփոխություն է անհրաժեշտ, տեսական ցանկություններից պետք է անցնել արդյունավետ ծրագրի իրագործման ՝ չմոռանալով մասնավորի հետ համագործակցության մասին:
Ըստ Գագիկ Մակարյանի՝ եթե Հովիկ Աբրահամյանի կառավարությունը շարունակի նույն կերպ և էմոցիաներին տեղիք տալով հերքի պարզ ճշմարտությունները և լավ ծրագրերը կարճ ժամկետում կյանքի չկոչի, կտապալվի: