Կենտրոն և Նորք-Մարաշ վարչական շրջանների ընդհանուր իրավասության դատարանում Մնացական Մարտիրոսյանի նախագահությամբ ավարտվել է Ալիկ Դ.-ի, Լեռնիկ Ա.-ի և Ղևոնդ Ա.-ի (անունները փոխված են) գործի դատական քննությունը:
32-ամյա Ալիկը, 19-ամյա Լեռնիկը և 35-ամյա Ղևոնդը առաքիչներ են եղել, Ղևոնդը ամուսնացած է, խնամքին երկու անչափահաս երեխա ունի:
Ըստ մեղադրանքի՝ Ալիկն իմացել է, որ իր նշանած աղջիկը՝ Կարինեն (անունը փոխված է) մտադրություն ունի վերադարձնելու նշանադրության մատանին և դադարեցնելու իրենց հարաբերությունները:
Ալիկը վերջնական խոսելու պատրվակով 2014 թվականի սեպտեմբերի 28-ին, ժամը 18-ն անց 30-ին աղջկան հրավիրել է Ամիրյան փողոցում գտնվող «Սեգաֆրեդո» սրճարան: Այնուհետև նրանք քայլելով գնացել են Հանրապետության հրապարակ, որտեղ, իբր պատահաբար, հանդիպել են Ալիկի գործընկերներ Ղևոնդին ու Լեռնիկին:
Նախնական պայմանավորվածության համաձայն, Կարինեին տուն ուղեկցելու պատրվակով նստել են Լեռնիկի կողմից վարած, Ա. Բ.-ին պատկանող «Մերսեդես» մեքենան և աղջկա կամքին հակառակ, նրան առևանգելով՝ տեղափոխել են Գավառ, այնտեղից նորից բերել են Երևան՝ Ալիկի բնակարան, որտեղ սեպտեմբերի 28-ի լույս 29-ի գիշերը՝ ժամը 2-ի սահմաններում, Ալիկը բռնաբարել է Կարինեին:
Ալիկ Դ.-ին մեղադրանք է առաջադրվել աղջկան առևանգելու և բռնաբարելու համար՝ ՀՀ քրեական օրենսգրքի 131 հոդվածի 2-րդ մասի 1-ին կետով և 138 հոդվածի 1-ին մասով:
Լեռնիկ Ա.-ին և Ղևոնդ Ա.-ին մեղադրանք է առաջադրվել խմբի կազմում նախնական համաձայնությամբ առևանգում կատարելու համար՝ ՀՀ քրեական օրենսգրքի 131 հոդվածի 2-րդ մասի 1-ին կետով:
Դատարանը հիմնավորված է գնահատել, որ Ալիկը, որպես առաքիչ աշխատելով մի ընկերությունում, իր գործընկերոջ տանը տեսել ու ծանոթացել է վերջինիս քրոջ՝ Կարինեի հետ: Նրանք մտերմացել են, մեկ տարի ընկերություն են արել և որոշել են ամուսնանալ:
Ալիկը նշանադրության արարողության ժամանակ՝ 2014 թվականի սեպտեմբերի 21-ին, մատանի է նվիրել Կարինեին:
Մեկ շաբաթ անց՝ սեպտեմբերի 27-ին, Ալիկի ծնողները Կարինեի ծնողներին հրավիրել են իրենց տուն՝ խնամականչի:
Ընտանեկան խնջույքի ժամանակ Ալիկի հոր ինքնազգացողությունը խմածության պատճառով վատացել է, տհաճ մթնոլորտ է առաջացել:
Խնամիները նեղվել ու հեռացել են նրանց տանից:
Կարինեն հիասթափվել է, իր ընտանիքի անդամներին, ապա հեռախոսով՝ Ալիկին հայտնել է, թե ցանկանում է նշանի մատանին վերադարձնել, չեղյալ համարել նշանադրությունը և խզել իրենց հարաբերությունները:
Հաջորդ օրը Կարինեն գնացել է աշխատանքի: Նա «Ֆեյսբուքի» միջոցով հաղորդագրություններ է ստացել Ալիկից: Վերջինս առաջարկել է մատանին ու նվերները վերադարձնելու, վերջնական խոսելու համար հանդիպել:
Աղջիկը մերժել է, ասել է, թե մատանին ու նվերները կարող են վերցնել իրենց բնակարանից:
Բայց Ալիկն առաջարկել է «քաղաքակիրթ ձևով» բաժանվել, ու Կարինեն, ի վերջո, վստահել ու համաձայնել է հանդիպել նրա հետ ժամը 18-ի սահմաններում:
Նույն օրը կեսօրին Ալիկը Կարինեին առևանգելու վերաբերյալ նախնական համաձայնության է եկել իր գործընկերներ Լեռնիկի ու Ղևոնդի հետ: Առևանգումը որոշել են իրականացնել իրենց մեկ այլ գործընկերոջ մեքենայով՝ առանց նրան այդ մասին տեղյակ պահելու:
Պայմանավորված ժամին Ալիկն ու Կարինեն հանդիպել են: Գնացել են «Սեգաֆրեդո» սրճարան: Մոտ կես ժամ մնացել են այնտեղ:
Ապա որոշել են գնալ Կարինեի տուն՝ նշանի մատանին ու նվերները վերցնելու, «կիրթ ձևով» միմյանց հրաժեշտ տալու:
Ղևոնդն ու Լեռնիկը գործընկերոջ «Մերսեդեսով» սպասել են հրապարակում՝ «Արմենիա Մարիոթ» հյուրանոցի հարևանությամբ:
Երբ Ալիկն ու Կարինեն հասել են հրապարակ, տեսել են Ալիկի գործընկերներին, ու նրանք առաջարկել են Կարինեին մեքենայով տուն տանել:
Աղջիկը սկզբում մերժել է, բայց Ալիկը համոզել է նրան, բացի այդ նրան հանգստացրել է մյուս տղաների ներկայությունը:
Աղջիկը մեքենա է նստել, բայց Լեռնիկը մեքենան վարել է բոլորովին այլ ուղղությամբ: Դա աղջկա մոտ խուճապ է առաջացրել: Ալիկն ասել է, թե առևանգում են նրան:
Ալիկն աղջկանից վերցրել է հեռախոսը, անջատել ու տվել է Ղևոնդին, բռնել է Կարինեի ձեռքերը, ուժ գործադրելով՝ ճնշել է նրա դիմադրությունը, իսկ Լեռնիկը ներքին փականով փակել է Կարինեի կողմի դուռը ու մեքենան վարել է դեպի Գավառ:
Կարինեին հասցրել են Գավառ: Աղջիկը հրաժարվել է մեքենայից իջնել՝ ինչքան էլ համոզել են:
Դեռ ճանապարհին եղած ժամանակ աղջկա հայրը հեռախոսով խոսել է Ալիկի հետ, ասել է, թե առևանգման մասին արդեն հայտնել է ոստիկանությանը:
Տղաները որոշել են Գավառից վերադառնալ Երևան:
Ճանապարհին Ալիկին զանգել է ոստիկանության աշխատակիցը, հրավիրել է ոստիկանություն: Ալիկի հետ խոսել են նաև նրա ընտանիքի անդամները՝ հարցրել են՝ ի՞նչ է կատարվում:
Կեսգիշերին մոտ Կարինեին հասցրել են Ալիկի տան բակ: Ալիկն աղջկան առաջարկել է իր տանը կարճ զրույց ունենալ: Լեռնիկն ու Ղևոնդը հեռացել են:
Ալիկը գրկել է Կարինեին, տարել է առաջին հարկում գտնվող իր բնակարան, որտեղ եղել է նաև Ալիկի մայրը: Հետո նա մյուս որդու հետ հեռացել է բնակարանից:
Ալիկը Կարինեի հետ մենակ է մնացել: Որոշ ժամանակ զրուցել են:
Հասկանալով, որ չի կարողանում աղջկան համոզել՝ դառնալու իր կինը, Ալիկը բանալիով փակել է բնակարանի դուռը, աղջկան տարել է ննջարան, ասել է, թե նա կամ իրենն է լինելու կամ՝ ոչ մեկինը, և բռնաբարել է՝ խախտելով աղջկա կուսաթաղանթի ամբողջականությունը և պատճառելով մարմնական վնասվածքներ:
Առավոտյան Ալիկի հարազատները տուն են վերադարձել, շնորհավորել են երիտասարդներին՝ «ամուսնության» առթիվ: Կարինեն առաջարկել է միասին գնալ իրենց տուն:
Ճանապարհին զանգել է ոստիկանության աշխատակիցը, Կարինեին հրավիրել է ոստիկանություն: Կարինեն առաջարկել է բոլորով գնալ ոստիկանություն՝ խոստանալով այնտեղ ասել՝ իբր ամեն ինչ իր կամքով է եղել:
Ալիկն ու հարազատները հավատացել են: Գնացել են ոստիկանություն, որտեղ Կարինեն հաղորդում է տվել իրեն առևանգելու և բռնաբարելու մասին:
Ընդհանուր իրավասության դատարանը հաստատված է գնահատել ամբաստանյալներին մեղսագրված արարքները:
Ալիկ Դ.-ն մեղավոր է ճանաչվել ՀՀ քրեական օրենսգրքի 131 հոդվածի 2-րդ մասի 1-ին կետով ու 138 հոդվածի 1-ին մասով և վերջին հաշվով դատապարտվել է 6 տարի ազատազրկման: Պատժի սկիզբը՝ 2014 թվականի սեպտեմբերի 29-ից:
Լեռնիկ Ա.-ն մեղավոր է ճանաչվել ՀՀ քրեական օրենսգրքի 131 հոդվածի 2-րդ մասի 1-ին կետով և դատապարտվել է 4 տարի ազատազրկման: Առևանգման ժամանակ մեքենան վարած Լեռնիկը կալանքի տակ է առնվել դատարանի դահլիճում՝ դատավճռի հրապարակման պահին: Նրա պատժի սկիզբը կհաշվվի 2015 թվականի սեպտեմբերի 23-ից:
Ղևոնդ Ա.-ն մեղավոր է ճանաչվել ՀՀ քրեական օրենսգրքի 131 հոդվածի 2-րդ մասի 1-ին կետով, դատապարտվել է 4 տարի ազատազրկման: Երկու անչափահաս երեխաների հայր Ղևոնդի նկատմամբ պայմանական դատապարտություն է կիրառվել ու սահմանվել է 4 տարի փորձաշրջան: