«Ինչպես է Սերժ Սարգսյանը հավաքել այդ 103 «կողմ»-ը, բոլորս էլ գիտենք. թե ոնց է ձևավորել ընդհանրապես իր իշխանական թիմը, թե ոնց է շանտաժով, սպառնալիքներով կամ կաշառքով մարդկանց տեղափոխել: Հարցն այն է, որ այդ 103-ի մեջ չկա մի հոգի, որ հավատա նրան, ինչ-որ ինքն անում է,- «Առաջին լրատվական»- ի հետ զրույցում ասաց ՀԱԿ գործադիր քարտուղար Սամվել Աբրահամյանը:
Պայքարը շարունակվելու է, և հնարավո՞ր է, որ Լևոն Տեր-Պետրոսյանը հարթակում երևա. պատասխանելով այս հարցին՝ Սամվել Աբրահամյանը նշեց. «Լևոն Տեր-Պետրոսյանը ՀԱԿ-ի նախագահն է, և ՀԱԿ-ը ինչ էլ որ անում է, անկախ իր ֆիզիկական ներկայությունից, նա այդ ամեն ինչին մասնակցում է»:
Ս. Աբրահամյանը նաև հավելեց, որ այսօր Հայաստանում ցանկացած օրակարգ կարող է բերել իշխանափոխության, «որովհետև իշխանության վարկանիշն այնքան ցածր է, ատելությունն այս իշխանության նկատմամբ այնքան մեծ է, որ ցանկացած օրակարգ կարող է դրան բերել, սահմանադրական փոփոխությունների գործընթացը նույնպես: Խնդիրն այն է, թե մենք, որպես գործընթացի մասնակիցներ, ինչպես կկազմակերպենք այն: Հասարակական տրամադրությունների խնդիր գոյություն չունի այս պահին: Բոլորը շատ լավ հասկանում են՝ ինչ է անում Սերժ Սարգսյանը, նրա մեթոդներն էլ գիտեն, ուղղակի ռեալ հաջողությունների ուղի են ուզում տեսնել: Այ այդ ուղին պետք է մենք իրենց առաջարկենք»: