Նոյեմբերի 9-10-ին Երեւանում տեղի կունենա «Արդար դատաքննություն եւ դատական իրավունքի անկախություն» թեմայով ԵՄ-Հայաստան հասարակական կազմակերպությունների համաժողովը: Եվրոպական հանձնաժողովի կազմակերպած համաժողովը կներկայացնի Հայաստանի եւ Եվրոպական միության քաղաքացիական հասարակության դերակատարների, այդ թվում մարդու իրավունքների ակտիվիստների, դատավիճողների եւ հետազոտողների, գիտնականների, մասնագիտացված իրավական կազմակերպությունների անդամների, գործող փաստաբանների: Համաժողովին մասնակցելու են նաեւ Հելսինկյան քաղաքացիական ասամբլեայի հայկական կոմիտեի համանախագահ Նատալյա Հարությունյանը եւ ՀՀ քաղբանտարկյալների եւ հալածյալների պաշտպանության կոմիտեի համակարգող Վարդան Հարությունյանը: Մեզ հետ զրույցում նրանք նշեցին, թե չնայած այն հանգամանքին, որ համաժողովը բաց է բոլորի համար, սակայն հրապարակայնություն չի եղել: «Եթե մենք չդիմեինք, ապա չէինք մասնակցի: Կազմակերպիչների կողմից որեւէ հրապարակային հայտարարություն, թե ֆորումը բաց է, չի եղել: Հնարավոր է, որ ոչ մի հայաստանյան կառույց չներառեին, ես չգիտեմ, թե նրանք ում համար էին նախատեսել այդ ֆորումը, որն էր պատճառը, որ այդքան փակ էր ֆորումի մասին ինֆորմացիան»,- ասաց Վարդան Հարությունյանը և նշեց, որ եթե ելույթի հնարավոություն ընձեռվի, ապա ինքը բարձրաձայնելու է Հայաստանում առկա քաղբանտարկյալների հարցը: