Ադրբեջանական Turan լրատվական գործակալության փոխանցմամբ՝ Մեծ Բրիտանիայի կառավարության՝ Եվրոպայի հարցերով նախարար Դևիդ Լիդինգթոնը հանդես է եկել հայտարարությամբ՝ կապված Խադիջա Իսմայիլովային տևական ժամկետով ազատազրկման դատապարտելու հետ:
«Ես խորապես մտահոգված եմ Խադիջա Իսմայիլովային 7.5 տարվա ազատազրկման դատապարտելու կապակցությամբ։ Ես նաև մտահոգ եմ այն հաղորդումների առնչությամբ, թե ինչպես է անցել դատը, և Ադրբեջանի իշխանություններին կոչ եմ անում վերանայել այդ գործն արդար ու թափանցիկ ձևով։
Մենք Ադրբեջանին կոչ ենք անում հարգել օրենքի գերակայությունն ու ձեռնարկել կոնկրետ քայլեր՝ մարդու իրավունքների շուրջ տիրող իրավիճակը բարելավելու համար՝ համաձայն ստանձնած միջազգային պարտավորությունների։
Մեծ Բրիտանիան օգտագործելու է յուրաքանչյուր հնարավորություն, որպեսզի բարձրացնի Ադրբեջանում մարդու իրավունքների շուրջ տիրող իրավիճակի հարցը»,- ասել է բրիտանացի նախարարը։
Լիդինգթոնը հավելել է, որ Ադրբեջանում շատ իրավապաշտպաններ ու քաղաքացիական ակտիվիստներ ազատազրկվել են խաղաղ գործունեության համար։
