Ռուսական TASS լրատվական գործակալության փոխանցմամբ՝ Մոսկվայում հուսով են, որ ադրբեջանական կողմը կմասնակցի Russia Arms Expo-2015 ցուցահանդեսին։ Այդ մասին սեպտեմբերի 1-ին Ադրբեջանի նախագահ Իլհամ Ալիևի հետ հանդիպման ժամանակ հայտարարել է Ռուսաստանի արտգործնախարար Սերգեյ Լավրովը:
«Մենք հուսով ենք, որ մեր ադրբեջանցի ընկերները կմասնակցեն ռազմատեխնիկական արտադրանքի ցուցահանդեսին, որը սեպտեմբերին տեղի է ունենալու Սվերդլովսկի մարզում։ Ադրբեջանի ներկայացուցիչները ստացել են համապատասխան հրավեր»,- ասել է Լավրովը։
Լավրովն ադրբեջանական կողմին շնորհակալություն է հայտնել օգոստոսին Բաքվում Կասպյան նավատորմի երեք նավերի այցը լավ կազմակերպելու համար։ Russia Arms Expo-2015 ռազմական ցուցահանդեսը Նինժնի Տագիլում անցկացվելու է սեպտեմբերի 9-12-ը։
Լավրովը հավելել է, որ Ռուսաստանի առևտրի ու արդյունաբերության նախարար Դենիս Մենտուրովը շուտով կայցելի Ադրբեջան։ Լավրովի խոսքերով՝ Ռուսաստանն ուրախ է ադրբեջանական գյուղատնտեսական արտադրանքի մատակարարումների աճի կապակցությամբ։