Վարչապետ Հովիկ Աբրահամյանը հայտարարել է, որ սահմանադրական փոփոխություններից հետո ակնկալում է միայն բարձր պաշտոն: Հովիկ Աբրահամյանը փաստորեն հայտարարել է սահմանադրական փոփոխություններին աջակցելու իր պայմանը. բարձր պաշտոն կտան՝ կաջակցի:
Իսկ ի՞նչ կանի Աբրահամյանը, եթե նրան բարձր պաշտոն Սերժ Սարգսյանը չխոստանա: Կտապալի՞ փոփոխությունները: Ինչպես հայտնի է, Սարգսյանը մտադիր է փոփոխությունների հանրաքվեի շտաբի պետ նշանակել Հովիկ Աբրահամյանին: Երևի թե Աբրահամյանն էլ հայտարարում է, թե ինչ պայմանով կստանձնի այդ պարտականությունը:
Մյուս կողմից, իսկ Հովիկ Աբրահամյանը այլ ելք ունի՞: Սրան զուգահեռ կա նաև հարցը, թե իսկ Սերժ Սարգսյանը նրան բարձր պաշտոն չտալու ելք ունի՞, տարբերակ ունի՞: Եվ վերջապես, մեկ այլ հարց էլ՝ իսկ որոշողը Սերժ Սարգսյա՞նն է լինելու, թե՞ պաշտոնները բաժանվելու են իշխանական համակարգի, այսպես ասած, կոլեգիալ որոշումով, և Հովիկ Աբրահամյանը իր պայմանները ոչ թե Սերժ Սարգսյանին միայն, այլ ողջ իշխանական համակարգին է ներկայացնում:
Սրան զուգահեռ, սակայն, խնդիրն այն է, որ սահմանադրական փոփոխությունների դեպքում բարձր պաշտոն արտահայտությունը խիստ հարաբերական է դառնում: Բարձր պաշտոնները կարծեք թե դառնում են մի քանիսը, և ըստ այդմ շատ դժվար է ասել, թե որն է իրապես ամենաբարձրը՝ հատկապես նկատի ունենալով, որ Հայաստանի իշխանական համակարգում հարցերն ու հարաբերությունները ըստ էության կարգավորվում են ոչ սահմանադրական ռեժիմում: Եվ այս տեսանկյունից, ո՞ր պաշտոնն է Հովիկ Աբրահամյանը համարում բարձր՝ վարչապե՞տ, ԱԺ նախագա՞հ, նշանակովի նախագա՞հ, որն այնուհանդերձ ունի զգալի լիազորություններ: Ավելին՝ իրադարձությունների զարգացման տրամաբանությունը հուշում է, որ սահմանադրական փոփոխությունների դեպքում դե ֆակտո բարձր պաշտոն է դառնում ՀՀԿ նախագահի պաշտոնը: Եվ այս տեսանկյունից, իհարկե, հարց է առաջանում, թե արդյոք Հովիկ Աբրահամյանը բարձր պաշտոնների թվում այս պաշտոնը և՞ս նկատի ունի:
Բոլոր դեպքերում, Հովիկ Աբրահամյանի հայտարարությունն իհարկե վկայում է մի բանի մասին. իբր Հայաստանի զարգացման համար իրականացվող սահմանադրական փոփոխությունների գործընթացը ոչ այլ ինչ է, քան իշխանական պաշտոնների բաժանում և վերաբաժանում, ու, ըստ էության, բոլորին այդ գործընթացում հետաքրքրում են միայն պաշտոնները, թե ում ինչ է բաժին հասնելու:
Հայաստանում տնտեսությունը մոտեցել է աղետի ու կոլապսի շեմին, իսկ դրա համար պատասխանատու, տնտեսական արդյունքների համար պատասխանատու կառավարության ղեկավարը մտածում է, թե ինչ պաշտոն է իրեն բաժին հասնելու սահմանադրական փոփոխություններից հետո:
Որովհետև պաշտոնն ամեն ինչ է, և դրանից է կախված կապիտալի ու անձնական անվտանգությունը: Բոլորի խնդիրն է դա, բոլորի համար սահմանադրական փոփոխություններն ունեն միմիայն հենց այդ նպատակը, և Հովիկ Աբրահամյանը բացառություն չէ, այլ ընդամենը շատ վառ ցուցիչ: