News Georgia լրատվական գործակալության փոխանցմամբ՝ Վրաստանի պաշտպանության նախարար Թինա Խիդաշելին «Մաեստրո» հեռուստաընկերության եթերում հայտարարել է, որ Վրաստանը չի շեղվի արևմտամետ ուղուց՝ չնայած Ռուսաստանի դիրքորոշմանը, որի համար սադրանք կարող է լինել անգամ հարևան երկրի անկախության փաստը։
Երեկ Վրաստանում բացվել է ՆԱՏՕ-ի հետ համատեղ ուսումնական կենտրոնը, ինչը ՌԴ ԱԳՆ-ն որակել է որպես դաշինքի կողմից սադրիչ քայլ և ապակայունացնող լուրջ գործոն։ Խիդաշելին հայտարարել է. «Ռուսաստանը, ելնելով իր պետական շահերից, կարող է որպես սադրանք գնահատել Վրաստանի անկախության գոյության փաստը։
Ի՞նչ պետք է անենք մենք։ Վրաստանն անկախ, ժողովրդավարական պետություն է, և մեր հավակնությունն այն է, որ Վրաստանն իր պատմական տեղը զբաղեցնի եվրոպական ընտանիքում, այն ընտանիքում, որից Ռուսաստանը նրան պոկել է երկու դար առաջ։ Բոլորը պետք է համակերպվեն Վրաստանի կատարած ընտրության հետ։
Վրաստանի ընտրությունն անդառնալի է, և որքան շուտ բոլորը հաշտվեն դրա հետ, այնքան հեշտ կլինի հարաբերությունները կարգավորելը, որոնք մեզ բաժանում են իրարից և առաջացնում են քաոս, ճգնաժամ ու կոնֆլիկտներ։ Մենք հետևում ենք այդ ընտրությանն ու չենք պատրաստվում շեղվել այդ ուղուց։ Վրաց ժողովուրդը մշտապես ընտրել է այն իշխանություններին, որոնք որդեգրել են եվրոատլանտյան կուրս»։
