Ավան և Նոր Նորք վարչական շրջանների ընդհանուր իրավասության դատարանում Դավիթ Հարությունյանի նախագահությամբ ընթանում է Արա Շ.-ի գործի քննությունը:
48-ամյա Արան շուրջ 10 տարի հաշվառված է Ավանի հոգեբուժական կլինիկայում՝ «Շիզոֆրենիա, պարանոիդ ձև՝ աճող դեֆեկտով» ախտորոշմամբ: Ներկայումս նա գտնվում է «Նուբարաշեն» հոգեբուժական բժշկական կենտրոնում:
Արան դատարան ներկայացվեց ուղեկցողների կողմից: Նա դատարանի դահլիճ մտավ հանգիստ, ամբաստանյալի տեղում նստեց՝ կրտսեր եղբորն ու իր շահերի պաշտպանին ողջունելուց հետո: Նախագահողի հարցերին Արան մի քիչ դանդաղ, բայց տեղը տեղին պատասխաններ էր տալիս:
Արտաքուստ, ճիշտ է, հիվանդագին բան չկար նրա պահվածքում, բայց Արան կարգավիճակով ամբաստանյալ չէ, այլ՝ քրեական օրենքով արգելված արարք կատարած անձ:
Արայի կողմից կատարված արարքը նախաքննական մարմինը որակել է որպես սպանության փորձ՝ ՀՀ քրեական օրենսգրքի 34-104 հոդվածի 1-ին մասով:
Դատարանը քննում է Արա Շ.-ի նկատմամբ բժշկական բնույթի հարկադրանքի միջոց կիրառելու հարցը:
Արայի օրինական ներկայացուցիչը նրա կրտսեր եղբայրն է, իսկ շահերը պաշտպանում է հանրային պաշտպան, փաստաբան Ջուվանովան: Արան նախագահողի հարցին ժպիտով պատասխանեց, որ լիովին վստահում է իր պաշտպանին…
Գործով տուժողը Արայի կինն է, ով դատարանի դահլիճում որևէ կերպ Արայի հետ չշփվեց: Արան էլ կնոջը չնայեց: Նախագահողի հարցին Արան պատասխանեց, որ երկու չափահաս երեխա ունի:
Նախաքննական մարմինը Արայի արարքը այսպես է նկարագրել. 2015 թվականի ապրիլի 14-ին, ժամը 21-ն անց 30-ի սահմաններում, կնոջը կասկածելով անհավատարմության համար, խանդի հողի վրա նա կնոջ հետ վիճաբանություն է սկսել իրենց բնակարանում: Վիճաբանության ժամանակ Արան, «կնոջը կյանքից զրկելու դիտավորությամբ», 5-րդ հարկից նրան ցած նետելու նպատակով անակնկալ հարձակվել է կնոջ վրա, բռնել է ոտքերից, բարձրացրել է վեր ու դուրս է հրել խոհանոցի բաց պատուհանից:
Սակայն Արայի կամքից անկախ հանգամանքով պայմանավորված՝ սպանություն տեղի չի ունեցել. նիհարակազմ կինը չի հանձնվել, ակտիվորեն դիմադրել է համեմատաբար հաղթանդամ Արային ու կարողացել պաշտպանել իր կյանքը: Նա կարողացել է ննջասենյակի բաց պատշգամբի արգելապատնեշի վրայով անցնել հարևանուհու բնակարան ու փրկվել…
Դատարանում Արան, պատասխանելով նախագահողի հարցերին, ասաց, որ տասը տարի սովորել է դպրոցում, հինգ տարի՝ պոլիտեխնիկում՝ լուսատեխնիկական ինժեների մասնագիտություն ունի: Սովետի տարիներին աշխատել է էլեկտրալամպերի գործարանում:
Այնուհետև մեկնել է արտագնա աշխատանքի: Աշխատել է Լեհաստանում, ապա Ռուսաստանում: Մոտ տասը տարի առաջ նրա մոտ ի հայտ է եկել «այդ» հիվանդությունը: Նա բուժվել է նաև ստացիոնար, վերջին անգամ ստացիոնար բուժում է ստացել 2011 թվականին…
Դատաքննության նախապատրաստական փուլի ավարտին փաստաբան Ջուվանովան միջնորդեց իրեն ժամանակ տրամադրել՝ գործի նյութերին լիարժեք ծանոթանալու համար: Պարզվեց, որ տուժող կինն էլ լիարժեք չի ծանոթացել գործի նյութերին, չնայած նախաքննության ավարտին գրառում է կատարել, թե ծանոթացել է, առարկություններ չունի:
Դատարանը բավարարեց պաշտպանի միջնորդությունը, ժամանակ տրամադրեց՝ գործի նյութերին լիովին ծանոթանալու համար:
Դատական հաջորդ նիստին՝ սեպտեմբերի 4-ին, պաշտպանական կողմը կհայտնի իր դիրքորոշումը առաջադրված մեղադրանքի վերաբերյալ:
