Vesti.ru-ի փոխանցմամբ՝ նավթային շուկայում նոր ամսվա սկիզբը նշանավորվեց ուժեղ գնանկմամբ. արդեն օգոստոսի առաջին օրը Brent տեսակի նավթի գինը նվազեց ավելի քան 4 տոկոսով։
Brent տեսակի մեկ բարել նավթի գինը նվազեց հոգեբանական 50 դոլարի սահմանագծից, ինչն առավելագույն անկումն էր՝ սկսած հունվարի վերջից։ Իսկ WTI տեսակի նավթի մեկ բարելը նվազել է մինչև 45 դոլար։ Ըստ ամենայնի, ընթանում է «մեծ խաղ», և նավթի գները սկզբունքորեն կարող են նվազել նաև մինչև 30 դոլար (Brent տեսակի մեկ բարել նավթի դիմաց)։
Ներկայումս շատ ԶԼՄ-ներ գրում են առաջարկի լուրջ ավելցուկի մասին, սակայն իրականում խնդիրն այստեղ դա չէ։
Օրինակ՝ երեկ տվյալներ հրապարակվեցին Չինաստանում գործարար ակտիվության մասին։ PMI-ի ինդեքսը նվազել է մինչև 48 կետ, ինչը միանշանակ վկայում է Չինաստանի՝ «սև ոսկու» խոշորագույն սպառողներից մեկի տնտեսության աճի տեմպերի դանդաղեցման մասին։
Սակայն նավթային գների դինամիկայի համար իրականում ավելի կարևոր է նավթի այն գինը, որով Չինաստանին վաճառում են հիմնական մատակարարները։ Սովորաբար շուկան ուշադրություն է դարձնում այն գնին, որը սահմանել է Սաուդյան Արաբիան։ Սովորաբար գնի մասին հայտարարվում է ամսվա սկզբին, այնպես որ՝ շուտով մենք կիմանանք օգոստոսյան գինը։
Փորձագետների կարծիքով՝ Սաուդյան Արաբիան օգոստոսին կբարձրացնի վաճառքի գները, սակայն տվյալ դեպքում նա ռիսկի է դիմում կորցնել շուկայի մի մասը։ Հուլիսին Սաուդյան Արաբիան ասիական սպառողների համար Arab Light տիպի նավթի մեկ բարելի դիմաց հայտարարել էր 10 ցենտի զեղչ։ Փորձագետներն ընդգծել են, որ եթե հունիսին Չինաստանի գնումներում սաուդյան նավթի մասնաբաժինը կազմում էր 35 տոկոս, ապա հուլիսին այն նվազել է մինչև 31 տոկոս։ Ի դեպ, ակնկալվում է նաև ռուսական նավթի մատակարարումների անկում։