Շվեդ ջրասուզակները հայտնել են, որ երկրի ջրային տարածքում հայտնաբերել են խորտակված ռուսական սուզանավ՝ շվեդ զինվորականների կողմից չճանաչված օտարերկրյա սուզանավի որոնման լայնածավալ գործողության ավարտից 9 ամիս անց: Այս մասին գրում է BBC-ն:
Շվեդիայի զինված ուժերի հրամանատարությունը առայժմ չի հաստատում դայվերների այս տեղեկությունը՝ ընդգծելով, որ պաշտպանության նախարարության փորձագետները դեռևս չեն նույնականացրել ենթադրյալ սուզանավը:
«Մեր վերլուծաբանները դեռևս չեն ներկայացրել իրենց եզրակացությունը և կցանկանային տեսնել (հայտնաբերված օբյեկտի) ավելի շատ պատկերներ, որը դայվինգային ընկերությունը պետք է մեզ ուղարկի»,- ասել է Շվեդիայի պաշտպանության նախարարության ներկայացուցիչ Անդերս Քալինը:
Նրա խոսքով՝ փորձագետների վերջնական եզրակացությունը պատրաստ կլինի առաջիկա օրերին, իսկ մինչ այդ հրամանատարությունը զերծ կմնա հայտարարություններից։
Ocean X Team ընկերության ջրասուզակներից Շտեֆան Հոգեբորնի խոսքով՝ չճանաչված հայտնաբերված օբյեկտը բացարձակապես խորտակված նավի տեսք չունի, դրա կորպուսը չունի նկատելի վնասվածքներ: