Ռուսաստանցի հայտնի քաղաքագետ Սերգեյ Մարկովի կարծիքով՝ Մինսկի խմբի ամերիկացի համանախագահ Ջեյմս Ուորլիքը Երևանում մի կողմից բավականին ընդհանրական հայտարարություն է արել՝ ասելով, որ ղարաբաղյան հակամարտության կարգավորումը հնարավոր է միայն Ղարաբաղի կարգավիճակի հստակեցումից հետո:
Մարկովը նման կարծիք հայտնեց «Առաջին լրատվական»-ի հետ զրույցում՝ հավելելով, որ մյուս կողմից այս հայտարարությունը կարող է պատասխան լինել Ռուսաստանի արտգործնախարար Սերգեյ Լավրովի այն հայտարարությանը, որ եկել է մի ժամանակաշրջան, երբ ղարաբաղյան հակամարտության կարգավորման հարցում կարող է բավականին լուրջ առաջընթաց գրանցվել. «Իմ կարծիքով՝ իրավիճակը հիմա մոտ է մի կետի, երբ հնարավոր է թեկուզև ժամանակավոր կոմպրոմիս Հայաստանի և Ադրբեջանի միջև»,- ընդգծեց նա:
Մեր զրուցակցի խոսքերով՝ փոխզիջումային տարբերակ կարող է լինել Ղարաբաղի շուրջ գտնվող 7 տարածքների հանձնումը Ադրբեջանին՝ Հայաստանի ապաշրջափակման դիմաց. «Այսինքն՝ Հայաստանը Ադրբեջանին վերադարձնում է այդ տարածքները և ազատվում ապաշրջափակումից, կարծում եմ՝ դա ընդունելի տարբերակ կլինի»,- ասաց նա՝ միևնույն ժամանակ ընդգծելով, որ սա ընդունելի տարբերակ կլինի Ռուսաստանի համար, բայց Եվրամիությունն ու Միացյալ Նահանգները դա չեն ցանկանում թույլ տալ, այդ պատճառով էլ նման հայտարարություններ են անում:
Սերգեյ Մարկովը հավելեց, որ իր առաջ քաշած տարբերակը կարող է լինել փոխզիջումային տարբերակներից մեկը:
Մեր այն հարցին, թե Ադրբեջանը արդյոք կհամաձայնվի՞ առանց Ղարաբաղի՝ միայն մի քանի տարածքների վերադարձմամբ հասնել հակամարտության կարգավորման, քաղաքագետը պատասխանեց. «Կարծում եմ, այո՛, կհամաձայնվի: Բայց Ադրբեջանը չի ճանաչի Ղարաբաղը հայկական, բայց կդադարեցնի ապաշրջափակումը: Ընդհանրապես ոչ միայն Ադրբեջանը, նաև Թուրքիան կբացի սահմանը»,- եզրափակեց նա:
