Սյունիքի մարզպետ Սուրիկ Խաչատրյանի դեմ իրականացված մահափորձի գործով ձերբակալված Արա Բուդաղյանը չի ընդունում ներկայացված կասկածանքները, «Ազատությանը» փոխանցել է այսօր նրա հետ հանդիպած պաշտպան Հայկ Ալումյանը՝ դրանք համարելով «անորոշ ու վերացական»։
«Ինչ-որ մարդկանց իբր թե դրդել է այդ գործողություններին։ Բայց այդ փաստաթղթի մեջ ոչ երևում է՝ ո՞ւմ է դրդել այդ գործողություններին, ոչ երևում է՝ ի՞նչ կերպ է դրդել, ե՞րբ է դրդել, ինչի՞ համար է դրդել և այլն։ Անորոշ կասկածանք է»,- ասել է Ալումյանը։
Արա Բուդաղյանը, ով մարզպետի դեմ մահափորձի գործով չորս ձերբակալվածներից մեկն է, 2013-ին Սուրիկ Խաչատրյանի տան մոտ սպանված, Գորիսի քաղաքապետի նախկին թեկնածու Ավետիք Բուդաղյանի կրտսեր եղբայրն է։
Արա Բուդաղյանն այսօր հարցաքննության ժամանակ հայտարարել է, որ որևէ առնչություն չունի մարզպետի դեմ իրականացված մահափորձին ու ոչ ոքի չի դրդել դրա իրագործմանը։
