2015 թվականի առաջին կեսին ամբողջ աշխարհում առնվազն 71 լրագրող է զոհվել աշխատանքի ընթացքում։ Ցուցանիշը 7 տոկոսով գերազանցում է 2014 թվականի նույն ժամանակահատվածի ցուցանիշը։ Այս մասին ասվում է Press Emblem Campaign (PEC) անկախ կազմակերպության զեկույցում, որի կենտրոնակայանը գտնվում է Ժնևում։ Այն զբաղվում է լրագրողների անվտանգության հարցերով՝ փոխանցում է RIA Novosti-ն։
Առնվազն 40 լրագրող է զոհվել Ֆրանսիայում, Եմենում, Սիրիայում, Լիբիայում, Իրաքում և Ուկրաինայում ահաբեկչական գործողությունների հետևանքով կամ զինված ընդհարումների լուսաբանման ժամանակ։ 30 լրագրող դարձել է քրեական հանցագործությունների զոհ, որոնք կատարվել են հակամարտության գոտիներից դուրս։
Առավել մեծ թվով լրագրողներ են զոհվել Մերձավոր Արևելքում և Հյուսիսային Աֆրիկայում. վերջին կես տարում նրանց թիվը եղել է 23։ Այնուհետև հաջորդում են Լատինական Ամերիկան (17) և Եվրոպան (13)։
Լրագրողների համար ամենավտանգավոր երկրների շարքում են Իրաքն ու Ֆրանսիան, որտեղ տարեսկզբին ահաբեկիչները գնդակահարել են երգիծական շաբաթաթերթի աշխատակիցների։ Այդ երկրներում զոհվել է 8-ական լրագրող։ Կազմակերպության հաշվարկներով՝ երրորդ տեղում Ուկրաինան է, այնտեղ զոհվել է 4 լրագրող։
