ԲՐԻԿՍ-ը կարող է դառնալ Հունաստանի համար լավ հնարավորություն երկրի վրա վարկատուների ճնշման պայմաններում՝ գրում է կանադական Global Research պարբերականը։
Ռուսաստանի ֆինանսների փոխնախարար Սերգեյ Ստորչակը մայիսին Հունաստանի վարչապետին առաջարկել է դառնալ ԲՐԻԿՍ-ի 6-րդ անդամը։ Այն ժամանակ Ալեքսիս Ցիպրասը հետաքրքրություն է դրսևորել, քանի որ դա թույլ կտար երկրին հասանելիություն ստանալ ԲՐԻԿՍ զարգացման բանկին։
Բանկի նպատակն է վերջ տալ Արևմուտքի գերակայությանը ֆինանսական շուկաներում և դառնալ առաջատար վարկային կազմակերպություններից մեկը։ Հավանաբար Ռուսաստանն ու Չինաստանը կկարողանան ֆինանսական աջակցություն ցուցաբերել Հունաստանին։ Ներկայում Աթենքը բանակցում է ԲՐԻԿՍ-ի այլ անդամների հետ՝ կազմակերպությունում երկրի հնարավոր մասնակցության վերաբերյալ։ Դրանք կշարունակվեն Ուֆայում հուլիսի 9-10-ը կայանալիք գագաթնաժողովի ընթացքում՝ նշում են հոդվածագիրները։
Հունաստանի պաշտպանության փոխնախարար Կոստաս Իսիխոսի կարծիքով՝ եթե Հունաստանում հանրաքվեի ժամանակ որոշում ընդունվի համաձայնել առաջադրված պայմաններին, ապա Հունաստանը կվերածվի Եվրոպայի տնտեսական գաղութի։
