Forbes պարբերականի փոխանցմամբ՝ «ՅՈՒԿՕՍ» ընկերության նախկին բաժնետերերը հասել են նրան, որ Ֆրանսիայի տարածքում կալանք դրվի Ռուսաստանի ակտիվների վրա: Նախօրեին հայտնի է դարձել, որ ռուսական գույքը՝ բացառությամբ դիվանագիտականի, կալանքի տակ է դրվել Բելգիայում:
Դա իրականացվել է 2014 թվականի հուլիսին Հաագայի դատարանի կայացրած որոշման համաձայն, որը Ռուսաստանին պարտավորեցրել է «ՅՈՒԿՕՍ» ընկերության նախկին բաժնետերերին վճարել 50 միլիարդ դոլարի փոխհատուցում՝ նավթային ընկերության ակտիվները բռնագրավելու համար:
Ֆրանսիայում ռուսական գույքի վրա կալանք դնելու մասին տեղեկատվությունը հաստատել է նաև Ռուսաստանի նախագահի օգնական Անդրեյ Բելոուսովը: «Մենք վիճարկելու ենք Ֆրանսիայի ու Բելգիայի, բոլոր երկրների մասով այդ որոշումները: Ինչ վերաբերում է Հաագայի դատարանի որոշման իրագործմանը, ապա կարծում ենք, որ այնտեղ թույլ են տրվել մի շարք իրավական անճշտություններ, ինչի համար էլ մենք բնականաբար բողոքարկելու ենք»,- ասել է նա: