Ադրբեջանի՝ Եվրասիական տնտեսական միության անդամ դառնալու հավանականությունը գնալով ավելի հավանական է թվում։ Եթե նախկինում այս մասին խոսվում էր միայն փորձագիտական շրջանակներում, ապա վերջերս այդ մասին ակնարկեց Ադրբեջանի արտգործնախարար Մամեդյարովը: Վերջինս ռուսաստանցի իր գործընկերոջ՝ Սերգեյ Լավրովի հետ հանդիպման ընթացքում հայտարարեց՝ Ադրբեջանը կմտածի Եվրասիական տնտեսական միության անդամ դառնալու մասին այն բանից հետո, երբ կարգավորվի Ղարաբաղյան հակամարտությունը:
ՌԴ առաջին կարգի պետական խորհրդական, REX գործակալության գլխավոր խմբագիր Մոդեստ Կոլերովը, «Առաջին լրատվական»-ի հետ զրույցում անդրադառնալով վերը նշված հայտարարությանն ու Ադրբեջանի՝ ԵՏՄ անդամ դառնալու հեռանկարներին, ասաց. «Ադրբեջանն ինչի մասին ասես՝ կարող է մտածել: Բայց Ադրբեջանի՝ Եվրասիական տնտեսական միությանն անդամակցելը կլինի Ռուսաստանի պայմաններով»:
Մոդեստ Կոլերովի կարծիքով՝ Ղարաբաղյան հակամարտության կարգավորումը հնարավոր է բացառապես Լեռնային Ղարաբաղի փոխզիջումային պայմաններով. «Այն դեպքում, երբ «Ղարաբաղյան» շարժումը ուներ «միացում» կարգախոսը, այժմ Հայաստանի և Ղարաբաղի կողմից փոխզիջումային տարբերակը Ադրբեջանի նկատմամբ Լեռնային Ղարաբաղի անկախությունն է»:
Մեր այն դիտարկմանը, թե ռուսաստանցի շատ փորձագետներ փոխզիջումային տարբերակ են համարում այն, որ Հայաստանը «7 շրջաններ վերադարձնի Ադրբեջանին», ՄոդեստԿոլերովն արձագանքեց. «Այդ շրջանները Հայաստանին չեն պատկանում: Այդ շրջանները Ղարաբաղի սահմանադրական տարածքներն են: Դրանք կարող է վերադարձնել միայն Լեռնային Ղարաբաղը։ Անվտանգության երաշխավորումը տարածվում է այդ բոլոր շրջանների վրա: Հետևաբար՝ կամ Հայաստանը Լեռնային Ղարաբաղի անվտանգության երաշխավորն է, կամ տալիս է այդ տարածքները: Հայաստանը չի կարող տալ շրջանները առանց Լեռնային Ղարաբաղի կամքի: Ինքնին այն ձևակերպումը, որ Հայաստանը պետք է Ադրբեջանին տա երկու-երեք շրջան, Ադրբեջանի իշխանությունների առաջ քաշած բանաձևն է, և այն ռուս փորձագետները, որոնք այդ բանաձևին աջակցում են, ուղղակի կրկնօրինակում են Ադրբեջանի դիրքորոշումը: Ոչ մի երկու շրջանի վերադարձման մասին խոսք լինել չի կարող»,- ընդգծեց մեր զրուցակիցը:
Ինչ վերաբերում է Եվրոպական խաղերի շրջանակներում Բաքու այցելած Վլադիմիր Պուտինի հանդիպումներին՝ նախ Էրդողանի, ապա Ալիևի հետ, և այն տեսակետներին, որ ռուս-թուրքական և ռուս-ադրբեջանական հարաբերությունների մերձեցումը կարող է ի վնաս Հայաստանի շահերի լինել, մեր զրուցակիցը պատասխանեց. «Ես կցանկանայի ասել, որ Ռուսաստանի և Թուրքիայի հարաբերությունները ոչ մի կերպ կախված չեն Ռուսաստանի և Ադրբեջանի հարաբերություններից, հավասարության նշան այստեղ դնում են Ադրբեջանի իշխանությունները»։
Նրա խոսքով՝ անգամ Թուրքիայի և Ադրբեջանի հարաբերությունները այնքան իդեալական չեն, որքան Բաքուն է ցույց տալիս. «Ռուսաստանի և Թուրքիայի հարաբերությունները Հայաստանի հետաքրքրությունների հետ կապ չունեն՝ մի պատճառով, որ Թուրքիային և Հայաստանին սահմանակից տարածքները մեծ հաշվով Քրդստանի տարածքներն են: Պետք չէ հավելյալ թշնամիներ ստեղծել, այդ դեպքում ավելի շատ ընկերներ կունենաս»։
