Եվրասիական տնտեսական միության (ԵՏՄ) հետ առևտրային հարաբերություններով իրենց հետաքրքրվածության մասին պաշտոնապես հայտարարել են ավելի քան 40 երկիր և միավորում: RIA Novosti-ի հաղորդմամբ՝ այս մասին հայտարարել է Ռուսաստանի վարչապետ Դմիտրի Մեդվեդևը, ով գլխավորում է ռուսական պատվիրակությունը Եվրասիական միջկառավարական խորհրդի նիստում, որը սկսվել է Ղազախստանում ընդլայնված կազմով:
Մեդվեդևը նշել է, որ ներկայումս բանակցություններ են ընթանում մի շարք գործընկերների հետ: «Եվ ամենայն հավանականությամբ, այդ բանակցությունները կշարունակվեն»,- հավելել է նա:
«Համենայնդեպս, իրենց հետաքրքրվածության մասին պաշտոնապես, նշում եմ՝ պաշտոնապես, տարբեր մակարդակի և տարբեր ինտենսիվությամբ այս կամ այն առևտրային հարաբերությունների մասին հայտարարել է ավելի քան 40 երկիր և միավորում: Նկատի ունեմ երկրներին ու միավորումներին, որոնք կուզենային այդպիսի հարաբերություններ հաստատել Եվրասիական առևտրատնտեսական միության հետ»,- ասել է Մեդվեդևը:
«Ուստի մենք պետք է կենտրոնանանք այդ ուղղությամբ և զարգացնենք հետագա համագործակցությունը մեր ներքին գործունեության մի շարք ուղղություններով»,- ասել է Ռուսաստանի վարչապետը Եվրասիական միջկառավարական խորհրդի պատվիրակությունների ղեկավարների հանդիպման ժամանակ:
