«Նախագահը բնականաբար իրավունք ուներ ելույթ ունենալ և՛ Ծառուկյանի, և՛ քաղաքական այլ ուժի վերաբերյալ: «Բարգավաճ Հայաստան» կուսակցության իրավունքն էր հակառակ քննադատությունն ուղղելու հանրապետության նախագահին, անցկացնելու իր խոստացած հանրահավաքը, արագ փոխելու իշխանությունը ՀԱԿ-ի և մյուս քաղաքական ուժերի հետ»,- հայտարարեց սահմանադրական փոփոխությունների հանձնաժողովի անդամ Վարդան Պողոսյանը՝ անդրադառնալով փետրվարին Սերժ Սարգսյանի կողմից ԲՀԿ նախկին ղեկավար Գագիկ Ծառուկյանին ուղղված կոշտ որակումներին:
Վ. Պողոսյանն ինքը բացասական է գնահատում այն հանգամանքը, որ որևէ մեկը մարդկանց մասին մականունով է խոսում: Լրագրողի հարցին, թե Գ. Ծառուկյանը կարո՞ղ է Ս. Սարգսյանից «պատիվ պահանջել» իրեն մականունով կոչելու համար, Վ. Պողոսյանն այսպես հակադարձեց. «Եթե պատիվ պահանջելու լիներ, լրատվամիջոցները հիմա դատարաններում պետք է պաշտպանվեին այն բանից, թե ինչու էին գրում Դոդի Գագո, ինչու էին ասում Լիսկա: Բնականաբար, պարոն Ծառուկյանը կարող է իր պատիվը պահանջել»:
