Կատարի Ալհոր քաղաքում անցած հանգստյան օրերին տեղի են ունեցել «Թալիբան» շարժման ներկայացուցիչների ոչ պաշտոնական հանդիպումները աֆղան պաշտոնյաների և քաղաքացիական ակտիվիստների հետ: The Wall Street Journal-ի հաղորդմամբ՝ բանակցություններն ընթացել են փակ դռների հետևում, բայց կողմերը դրանք համարում են խաղաղ պայմանագրային գործընթացի սկիզբ:
«Դա դրական և հետաքրքիր հանդիպում էր: Այդպիսի կապերը տարբեր քաղաքական ուժերի դիրքորոշումները կմոտեցնեն»,- պարբերականին ասել է թալիբների պատվիրակության ղեկավար Շեր Մուհամադ Աբաս Ստանիկզայը:
«Թալիբներն ասացին, որ հանդիպումների ժամանակ պետք է ներկայացված լինեն տարբեր քաղաքական ուժեր: Դա աննախադեպ է»,- ասել է աֆղանական կառավարության ներկայացուցիչը, որը ցանկացել է գաղտնի մնալ:
Բանակցությունների մասնակիցների շրջանում կարծիք է ձևավորվել, որ թալիբները պատրաստ են կոալիցիոն հարաբերությունների և ընտրական գործընթացին մասնակցության: «Նրանք չօգտագործեցին ընտրություններ բառը, բայց դա նկատի ունեին»,- ասել է բանակցությունների մասնակիցներից մեկը: Կողմերը ծրագրել են հանդիպումները շարունակել հունիսին:
Բանակցություններին մասնակցել է «Թալիբանի» 8 ներկայացուցիչ: Աֆղանական պաշտոնական իշխանություններն ուղարկել են իրենց ոչ պաշտոնական ներկայացուցիչներին վստահելի շրջանից: Օրինակ՝ Աֆղանստանի նախագահ Աշրաֆ Գանիին ներկայացրել է նրա հարազատ հորեղբայր Քայոմ Քոչայը:
Բանակցությունները պատրաստվել և իրականացվել են խիստ գաղտնիության մթնոլորտում: Հանդիպման փաստի մասին մասնակիցները պատմել են միայն դրա ավարտից հետո: Նրանք բոլորը նշել են միջոցառման բարեկամական մթնոլորտը. մասնակիցները միասին ճաշել են և հանգստացել: